რუსეთი მხარს უჭერს მიანმარის ხუნტას მცდელობებს კრიზისით განადგურებული ქვეყნის „სტაბილიზაციის“ მიმართულებით. ამის შესახებ რუსეთის საგარეო საქმეთა მინისტრმა სერგეი ლავროვმა ოთხშაბათს მიანმარის საგარეო საქმეთა მინისტრ ვუნა მაუნგ ლვინთან მოლაპარაკებების დროს განაცხადა.
სამხრეთ-აღმოსავლეთ აზიის ქვეყანა ქაოსშია გასულ წელს სამხედროების მიერ ხელისუფლებაში მოსვლის შემდეგ, როდესაც დისიდენტების წინააღმდეგ მიმართული ქმედებების შედეგად 2100-ზე მეტი ადამიანი დაიღუპა.
„ჩვენ სოლიდარობას ვუცხადებთ თქვენი პრემიერ-მინისტრისა და თქვენი მთავრობის ძალისხმევას მიანმარში სიტუაციის ნორმალიზებისა და სტაბილიზაციის მიმართულებით“, - განაცხადა ლავროვმა. „ ჩვენ ვიცით, რომ თქვენ მომავალ წელს საპარლამენტო არჩევნების ჩატარებას გეგმავთ და გისურვებთ წარმატებებს თქვენი ქვეყნის წინსვლასა და მისი სიძლიერის, ეფექტურობისა და კეთილდღეობის გაზრდაში“.
რუსეთი მიანმარის მთავარი მოკავშირე და იარაღის მიმწოდებელია, ადამიანის უფლებათა დამცველები კი მოსკოვს ადანაშაულებენ ხუნტას შეიარაღებაში იარაღით, რომელიც გასული წლის გადატრიალების შემდეგ მშვიდობიან მოსახლეობაზე თავდასხმისთვის გამოიყენეს. ლავროვის ვიზიტი მას შემდეგ განხორციელდა, რაც მიანმარის სამხედროებმა გასულ კვირას ოთხი პატიმრის, მათ შორის პარლამენტის ყოფილი წევრის, სიკვდილით დასჯის შესახებ გამოაცხადეს და საერთაშორისო აღშფოთება გამოიწვია. ეს ათწლეულების განმავლობაში ქვეყანაში სიკვდილით დასჯის გამოყენების პირველი შემთხვევაა.
ლავროვი კამბოჯაში სამხრეთ-აღმოსავლეთ აზიის ქვეყნების ასოციაციის (ASEAN) საგარეო საქმეთა მინისტრების შეხვედრას დაესწრება, რომელზეც ხუნტას უმაღლესი დიპლომატი არ იყო მიწვეული.
დასავლეთის მთავრობების მიერ მიანმარის ამჟამინდელი ხელისუფლების წინააღმდეგ სანქციების დაწესების ფონზე, ისინი სულ უფრო მეტად მიმართავენ მოკავშირეებს, მათ შორის ჩინეთსა და რუსეთს. ხუნტას ლიდერი მინ აუნგ ჰლაინგი ივლისში მოსკოვში იმყოფებოდა „კერძო ვიზიტით“ და, როგორც ამბობენ, შეხვდა მოსკოვის კოსმოსური და ბირთვული სააგენტოების წარმომადგენლებს.
არმიამ ძალაუფლების ხელში ჩაგდება 2020 წლის არჩევნებში ფართომასშტაბიანი გაყალბების ბრალდებით გაამართლა, რომელშიც აუნ სან სუ ჩის „დემოკრატიის ეროვნულმა ლიგამ“ (NLD) სამხედროების მიერ მხარდაჭერილი პარტია დაამარცხა.
არჩევნების შედეგები გაუქმდა. საერთაშორისო დამკვირვებლებმა არჩევნები ძირითადად თავისუფლად და სამართლიანად გამოაცხადეს.
ასეანი სულ უფრო იმედგაცრუებულია მიანმარში გასულ წელს შეთანხმებული ხუთპუნქტიანი სამშვიდობო გეგმის კუთხით პროგრესის არარსებობით.
კამბოჯის პრემიერ-მინისტრმა, ასეანის ამჟამინდელმა თავმჯდომარემ, ჰუნ სენმა ოთხშაბათს მიანმარი შემდგომი სიკვდილით დასჯის წინააღმდეგ გააფრთხილა. მან განაცხადა, რომ რეგიონული ბლოკი „იმედგაცრუებული და შეშფოთებულია“ გასული თვის სიკვდილით დასჯის გამო და რომ სიკვდილით დასჯის შემდგომი გამოყენება „ხუთპუნქტიანი სამშვიდობო გეგმის გადახედვას“ მოითხოვს.
