რუსეთმა სირიიდან S-300-ის საჰაერო თავდაცვის ბატარეა გამოიტანა და, სავარაუდოდ, მას ქვეყანაში აბრუნებს, იტყობინება The Times of Israel.
სატელიტური დაზვერვის კომპანია ImageSat International-ის (ISI) მიერ გადაღებული თანამგზავრული ფოტოები აჩვენებს, რომ S-300 სისტემა, რომელიც რამდენიმე წლის განმავლობაში სირიის ჩრდილო-დასავლეთით, მასიაფის ქალაქთან ახლოს იყო განლაგებული, ბოლო კვირების განმავლობაში დემონტაჟდა.
ISI-ის ცნობით, საჰაერო თავდაცვის რადარი სირიაში რუსეთის ხმეიმიმის საჰაერო ბაზაზე გადაიტანეს, ხოლო S-300-ის ბატარეა ტარტუსის პორტში რუსულ გემზე ჩაიტვირთა და ნოვოროსიისკში გადაჰყავთ. გემი შავი ზღვის პორტში უახლოეს დღეებში ჩავა.
ISI-ის ცნობით, რუსეთი სირიიდან S-300-ებს გაიყვანს, რათა უკრაინაში ომში საჰაერო თავდაცვის დანაკარგები შეავსოს.
უკრაინის შეიარაღებული ძალების გენერალური შტაბის ცნობით, რუსეთის არმიამ უკრაინაში ომში 148 საჰაერო თავდაცვის სისტემა დაკარგა.
