„24 თებერვალმა ყველაფერი გაანადგურა, რაც ჩემსა და ჩემს ქვეყანას შორის იდგა“, - განუცხადა არტემ ზინჩენკომ გაზეთ „Eesti Päevaleht“-ისა და „Yahoo News“-ის ჟურნალისტებს, რომლებიც ხუთი წლის წინ ჯაშუშობისთვის გასამართლებული „GRU“-ს ყოფილი აგენტის ესტონეთში დაბრუნების შესახებ აშუქებენ.
გავრცელებული ინფორმაციით, საუბარი ესტონეთის უსაფრთხოების პოლიციის (KAPO) შენობაში შედგა.
არტემ ზინჩენკო თავის გაქცევას რუსეთის მიერ უკრაინაში შეჭრისადმი წინააღმდეგობით ხსნის და ამბობს, რომ მისი უკრაინელი ნათესავები რუსული არმიის წინააღმდეგ იბრძვიან. მისი მეუღლე და სამი შვილი ესტონეთში 35 წლის მამაკაცთან ერთად დაბრუნდნენ.
ზინჩენკომ ასევე განუცხადა ჟურნალისტებს, რომ რუსეთში დაბრუნების შემდეგ ის სანქტ-პეტერბურგში ცხოვრობდა და „დიდი რაოდენობით პრობლემებს წააწყდა, რომელთა მოგვარებაც ახალი ცხოვრების დაწყებისას იყო საჭირო“. მისი თქმით, რუსეთში სიტუაცია მნიშვნელოვნად შეიცვალა და ყოველწლიურად მხოლოდ უარესდება.
კაპომ ზინჩენკო, რომელიც ტალინში ცხოვრობდა, 2017 წლის იანვარში ჯაშუშობის ეჭვის საფუძველზე დააკავა. პროკურატურის ცნობით, ის GRU-მ 2009 წელს დაიქირავა და ოთხი წლის შემდეგ ესტონეთში გადავიდა, სადაც ის აგროვებდა და გადასცემდა ინფორმაციას ეროვნული თავდაცვის ობიექტების, აღჭურვილობისა და თავდაცვის ძალების, თავდაცვის ლიგისა და მოკავშირეების ჯარების შესახებ.
ზინჩენკოს ხუთი წლით თავისუფლების აღკვეთა მიესაჯა, თუმცა 2018 წელს იგი შეიწყალეს და ესტონეთის მოქალაქე რაივო სუსიში გაცვალეს, რომელსაც ასევე 12 წლით თავისუფლების აღკვეთა ჰქონდა მისჯილი რუსეთში ჯაშუშობის ბრალდებით. გაცვლა ესტონეთ-რუსეთის საზღვარზე 2018 წლის 10 თებერვალს შედგა.
რუსეთის უშიშროების პოლიციის ყოველწლიური ანგარიში, რომელიც 2022 წლის აპრილში გამოქვეყნდა, განსაკუთრებულ ყურადღებას უთმობს ამ თემას. 60-გვერდიანი დოკუმენტის დაახლოებით ნახევარი ეთმობა რუსეთიდან მომდინარე ესტონეთის უსაფრთხოებისთვის სხვადასხვა საფრთხეს. ბოლო რამდენიმე წლის განმავლობაში ესტონეთში სულ მცირე 15 პირი დააკავეს რუსეთის სადაზვერვო სამსახურების სასარგებლოდ ჯაშუშობაში ეჭვმიტანილი. მიმდინარე წლის მარტში, უშიშროების პოლიციამ ესტონეთის სასაზღვრო გამშვებ პუნქტებზე საინფორმაციო პლაკატები განათავსა, რომლებიც ესტონეთში შემავალ და რუსეთში გამავალ პირებს უსაფრთხოების სამსახურების მიერ შესაძლო რეკრუტირების მცდელობების შესახებ აფრთხილებდა.
