რუსეთი გერმანიიდან, პოლონეთიდან და შვედეთიდან სამ დიპლომატს გააძევებს 23 იანვარს ალექსეი ნავალნის მხარდამჭერ საპროტესტო აქციებში მონაწილეობის გამო, იტყობინება RBC.
რუსეთის საგარეო საქმეთა სამინისტრომ დიპლომატების გაძევება დაადასტურა. ერთი დღით ადრე, საგარეო საქმეთა სამინისტროს პრესსპიკერმა მარია ზახაროვამ განაცხადა, რომ შვედი დიპლომატი ალექსეი ნავალნის მხარდამჭერ აქციაზე შენიშნეს. შვედეთის საელჩოს პრესსამსახურმა RBC-ს განუცხადა, რომ თანამშრომელი სანქტ-პეტერბურგში გამართულ აქციაში არ მონაწილეობდა, მაგრამ „დაესწრო“ მას, რაც „სტანდარტული დიპლომატიური პროცედურაა“.
საგარეო საქმეთა სამინისტრომ განაცხადა: „დიპლომატების წინააღმდეგ პროტესტი იქნა წარდგენილი შვედეთისა და პოლონეთის გენერალური საკონსულოების სანქტ-პეტერბურგში და გერმანიის საელჩოს დიპლომატიური პერსონალის 2021 წლის 23 იანვარს უკანონო საპროტესტო აქციებში მონაწილეობის შესახებ. ხაზგასმული იყო, რომ მათი მხრიდან ასეთი ქმედებები მიუღებელია და არ შეესაბამება მათ დიპლომატიურ სტატუსს“.
РБК აღნიშნავს, რომ დიპლომატების გაძევების შესახებ ცნობილი გახდა ევროკავშირის საგარეო პოლიტიკის უმაღლესი წარმომადგენლის, ხოსეპ ბორელის, რუსეთში ვიზიტის დროს. ერთი დღით ადრე მან შესთავაზა ევროკავშირსა და რუსეთს „უარყონ ნეგატიური რიტორიკა და დაიწყონ გულწრფელი დიალოგი“.
