მობილიზებული ჯარების ქალაქში ქუჩის ბრძოლებში „ქვემეხის ხორცად“ გამოყენება იგეგმება.
რუსებმა მარიუპოლის მათ მიერ კონტროლირებად ნაწილში მამაკაცების იძულებითი მობილიზაცია დაიწყეს.
ამის შესახებ მარიუპოლის მერის მრჩეველმა, პეტრო ანდრიუშჩენკომ განაცხადა.
„ქალაქის გარეუბანში, რომელსაც დროებით რუსები აკონტროლებდნენ, ოკუპანტებმა მამაკაცების იძულებითი მობილიზაცია დაიწყეს“, - აღნიშნა მან.
ანდრიუშჩენკოს თქმით, მობილიზებული ჯარების ქალაქში ქუჩის ბრძოლებში „ქვემეხის ხორცად“ გამოყენება იგეგმება.
„იმის გათვალისწინებით, რომ რუსები ბოლო კვირების განმავლობაში ვერ ახერხებდნენ წინსვლას დამცველების პროფესიონალური მუშაობის გამო, როგორც ჩანს, მათ გადაწყვიტეს მარიუპოლის მაცხოვრებლების ზურგს უკან დამალვა. ამიტომ, უთხარით მათ, ვინც მოულოდნელად დარჩენა გადაწყვიტა - ოკუპანტები მათ სიმშვიდეს არ მისცემენ, თუნდაც დაბომბვა შეჩერდეს“, - აღნიშნა მერის მრჩეველმა.
6 აპრილს, ბრიტანეთის დაზვერვამ დაადასტურა მარიუპოლში ჰუმანიტარული სიტუაციის გაუარესება. 160 000-ზე მეტ ადამიანს არ აქვს ელექტროენერგია, კომუნიკაციები, ჯანდაცვაზე, გათბობასა და წყალზე წვდომა.
რუსები აგრძელებენ ქალაქზე საჰაერო დარტყმებს. ინტენსიური ბრძოლები გრძელდება.
რუსი ოკუპანტები ჰუმანიტარული დახმარების მიწოდებას ბლოკავენ, რათა მარიუპოლის დამცველები დანებებას აიძულონ.
