რუსი ოკუპანტები ბერდიანსკის საცხოვრებელ უბნებში სამხედრო ტექნიკასა და საბრძოლო მასალის საწყობებს ათავსებენ.
ვრცელდება ინფორმაცია, რომ ბოლო კვირის განმავლობაში გახშირდა ოკუპანტების მიერ საბრძოლო მასალის საწყობებისა და სამხედრო ტექნიკის შენიღბვის, საცხოვრებელ უბნებში განთავსების და ასევე ჰუმანიტარული კოლონის საფარქვეშ საბრძოლო მასალის შემოტანის შემთხვევები.
„ბერდიანსკში უკვე დაფიქსირდა დიდი რაოდენობით სამხედრო ტექნიკისა და საბრძოლო მასალის საცხოვრებელი უბნების შუაგულში, მათ შორის აზმოლისა და კოლონიის უბნებში განთავსების შემთხვევები. ჩვენ მოვუწოდებთ მაცხოვრებლებს, გამოიჩინონ უკიდურესი სიფრთხილე და, თუ შესაძლებელია, თავი აარიდონ იმ ადგილებს, სადაც სამხედრო ტექნიკაა კონცენტრირებული“, - ნათქვამია განცხადებაში.
შეგახსენებთ, რომ ადრე გავრცელდა ინფორმაცია, რომ ბერდიანსკის მერი, რომელიც კოლაბორატორი იყო, თანამდებობიდან გაათავისუფლეს ე.წ. „რეფერენდუმისთვის“ მომზადების შეუძლებლობის გამო.
