უკრაინა აგროვებს მტკიცებულებებს რუსეთის შემოჭრის დროს ჩადენილი ომის დანაშაულების შესახებ, რათა წარუდგინოს ისინი საერთაშორისო სამართლიანობას.
ამის შესახებ ბრიუსელში ვიზიტად მყოფმა ვერხოვნა რადას ადამიანის უფლებათა კომისარმა, ლუდმილა დენისოვამ განაცხადა. მან Euronews-ს განუცხადა, რომ ოკუპირებული ტერიტორიებიდან ადამიანების იძულებით გადაადგილება აკრძალულია, თუმცა რუსებმა ასობით ათასი უკრაინელი დააზარალეს:
„ისინი უბრალოდ გადაადგილებულნი, ჩვენი ტერიტორიიდან დეპორტირებულნი იყვნენ. ჩვენი მოქალაქეები საკუთარი ნებით არ წასულან; ისინი იძულებით გადაიყვანეს ჯერ დონეცკის რეგიონში არსებულ ფილტრაციის ბანაკში, შემდეგ კი ავტობუსით გადაიყვანეს რუსეთში. იქიდან კი მატარებლით გადაჰყავთ სხვადასხვა ადგილას, მათ შორის რუსეთის ფედერაციის დეპრესიულ რეგიონებში, მათ შორის სახალინში.“.
ომბუდსმენმა განაცხადა, რომ უნდა შეიქმნას ცალკე ტრიბუნალი, რომელიც უკრაინაში ჩადენილი სისასტიკის ორგანიზებისთვის პრეზიდენტ ვლადიმერ პუტინს და მის გარემოცვას გაასამართლებს. იგი მიიჩნევს, რომ არსებული საერთაშორისო სასამართლო და საერთაშორისო სისხლის სამართლის სასამართლო მაღალი თანამდებობის პირების პასუხისგებაში მიცემის საშუალებებს ვერ უზრუნველყოფენ.
დენისოვა რუს ჯარებს მშვიდობიან მოსახლეობასა და სამოქალაქო ობიექტებზე თავდასხმაში ადანაშაულებს და მარიუპოლში მცხოვრები უკრაინელების მკვლელობას გენოციდს უწოდებს:
„მარიუპოლში სიტუაცია კვლავ რთული რჩება. ქალაქი ნანგრევებად არის ქცეული. საცხოვრებელი შენობების 90 პროცენტი დაბომბილია. დაახლოებით 20 000 მშვიდობიანი მოქალაქე დაიღუპა.“.
