მელიტოპოლის მერმა, ივან ფედოროვმა, განაცხადა, რომ მელიტოპოლში მყოფმა რუსებმა უკრაინის სატელეფონო და ინტერნეტ კავშირი დაბლოკეს „ოკუპირებული ქალაქის მაცხოვრებლების იზოლირების მიზნით“.
მისი თქმით, საოკუპაციო ძალების მანქანები ბოლო დღეებში ქალაქში ინტენსიურად მოძრაობენ. ესეც კომუნიკაციების გათიშვის ერთ-ერთი მიზეზი იყო — რათა უკრაინის უსაფრთხოების სამსახურებს მათი გადაადგილების თვალყურის დევნება არ შეძლებოდათ.
გარდა ამისა, გუშინ მელიტოპოლის ცენტრში აფეთქება მოხდა, რის შედეგადაც ორი ადამიანი დაშავდა, რომლებიც თავს ტერპენიევსკაიას გაერთიანებულ ტერიტორიულ თემში „ახალი ხელისუფლების“ წარმომადგენლებად აცხადებენ, იტყობინება ფედოროვი. „ამიტომ, როგორც ჩანს, რუსები კოლაბორაციონისტების წმენდას იწყებენ“, - განაცხადა მერმა. მან დასძინა, რომ ამ მოვლენას შესაძლოა კომუნიკაციების გათიშვაც გამოეწვია.
ამასობაში, რუსებმა უცნობი ოპერატორის SIM ბარათების გაყიდვა დაიწყეს. ფედოროვმა ქალაქის მაცხოვრებლებს მოუწოდა, ინფორმაცია ოფიციალური უკრაინული Telegram არხებიდან და VPN-ების საშუალებით მიეღოთ.
მერმა ასევე განაცხადა, რომ მელიტოპოლის მაცხოვრებლები იღებდნენ ტექსტურ შეტყობინებებს, რომლებშიც ეკითხებოდნენ რუსეთის საოკუპაციო ხელისუფლების მიმართ მათ დამოკიდებულებას. მან მოუწოდა მაცხოვრებლებს, არ ეპასუხათ ასეთ შეტყობინებებზე.
