ფრანგულმა ავტომწარმოებელმა Peugeot-მა წარმოადგინა Inception კონცეფცია, რომელიც ასახავს კომპანიის ხედვას ბრენდის ელექტრო მომავლის შესახებ. ეს ფუტურისტული ახალი მოდელი აერთიანებს მაღალტექნოლოგიურ, ახალი თაობის პლატფორმას სპორტული ავტომობილის ელეგანტურ დიზაინთან და მუშაობასთან.
ამის შესახებ მწარმოებლის პრესსამსახურმა განაცხადა. სახელწოდება Inception (ან „Inceptio“ ლათინურად) „დასაწყისს“ ნიშნავს. კონცეფცია აგებულია ოთხი მომავლის „BEV-by-design“ პლატფორმიდან ერთ-ერთზე - STLA. მას აქვს დაბალი პროფილი (1.34 მ) და 5 მ სიგრძე. ის მოიცავს ხელოვნურ ინტელექტზე დაფუძნებულ ტექნოლოგიურ მოდულებს: STLA Brain, STLA SmartCockpit და STLA AutoDrive.
Peugeot Inception აღჭურვილია ახალი ელექტროძრავით. მისი 100 კვტ/სთ სიმძლავრის აკუმულატორი სრული დატენვით 800 კმ-ის გავლას უზრუნველყოფს - მანძილი პარიზიდან მარსელამდე ან ბრიუსელიდან ბერლინამდე. ძრავა 100 კმ-ზე მხოლოდ 12.5 კვტ/სთ-ს მოიხმარს. სწრაფი დამუხტვის სადგურების გამოყენებით, შემდეგი 150 კმ-ის განმავლობაში აკუმულატორის შევსებას მხოლოდ ხუთი წუთი სჭირდება. კონცეფციას აქვს ორი კომპაქტური ელექტროძრავა, ერთი წინა და მეორე უკანა მხარეს, რომელთაგან თითოეული საკუთარ ბორბლებს ამოძრავებს. კომბინირებული სიმძლავრე 680 ცხენის ძალაა (500 კვტ), ხოლო 0-დან 100 კმ/სთ-მდე აჩქარებას 3 წამზე ნაკლები დრო სჭირდება.
ახალი კონცეპტის დიზაინი გამოირჩევა „ლომის კლანჭის“ ფორმის განათებით და განზრახ გადიდებული Peugeot-ის ახალი ლოგოთი. წინა პანელი დამზადებულია ერთიანი მინის ნაჭრისგან, რომელიც დაბეჭდილია INKJET ციფრული ტექნოლოგიით და შეიცავს ოთხ ოპტიკურ მოდულს. უკანა მხარეს ასევე აქვს ახალი განათების ხელმოწერა, რომელიც სამი „ლომის კლანჭის“ ფორმისაა, მაგრამ მინის ორი ფენის წყალობით, განათებას სამგანზომილებიანი ფორმა აქვს. კარზე განთავსებულია ციფრული პანელები, რომლებსაც შეუძლიათ სხვადასხვა შეტყობინების ჩვენება. მაგალითად, მძღოლს შეუძლია მიიღოს მნიშვნელოვანი ინფორმაცია ავტომობილის მდგომარეობისა და აკუმულატორის დატენვის შესახებ.
დიზაინის ერთ-ერთი მთავარი ელემენტი ინტელექტუალური მინაა. ავტომობილის მინის ზედაპირის ფართობი 7.25 კვადრატული მეტრია და მთლიანად მინა მრავალშრიანია. მთელი მინის ზედაპირი დამუშავებულია ლითონის ოქსიდებით, რაც ინარჩუნებს განსაკუთრებულ თერმულ თვისებებს - ტექნოლოგია, რომელიც პირველად NASA-მ გამოიყენა ასტრონავტების ჩაფხუტებისთვის. ეს Narima მინა ყვითელი და ლურჯი ელფერებით ბრწყინავს.
ახალ დიზაინს ავსებს Aeorim-ის დისკები, რომლებიც აერთიანებს აეროდინამიკასა და ესთეტიკას. ისინი შექმნილია ღერძული სიმეტრიის პრინციპის გამოყენებით, ისევე როგორც ახალი Peugeot 408-ის 20 დიუმიანი დისკები. ჭედური ელემენტები აუმჯობესებს აეროდინამიკურ მაჩვენებლებს, ხოლო მიკროპერფორირებული ალუმინის ჩანართები დახვეწილ დიზაინს გვთავაზობს. დიზაინის ცენტრალური ელემენტია ემბლემა, რომელიც ბორბლის ბრუნვისას უძრავად რჩება. ბორბლის შიგნით მდებარე სამუხრუჭე კალიპერს სარკისებური დასრულება აქვს.
დიზაინერებმა კლასიკური საჭე და ნაცნობი მართვის საშუალებები მოხსნეს. კონცეფცია Hypersquare-ის მანქანის მართვის ახალ გზას გვთავაზობს, რომელიც ვიდეო თამაშს მოგვაგონებს. Hypersquare-ის ცენტრალურ ნაწილს წარმოადგენს ეკრანი, რომელზეც მართვის შესახებ ინფორმაციაა გამოსახული. მძღოლს საჭიდან ხელების მოხსნის გარეშე შეუძლია ცერა თითების გამოყენებით დაარეგულიროს სხვადასხვა ფუნქცია: კონდიციონერი, რადიოს ხმის სიმძლავრე, ADAS და სხვა. განახლებული i-Cockpit-ის ძირითადი ელემენტია Halo Cluster, სისტემა, რომელიც ავტომობილის შესახებ ინფორმაციისა და მულტიმედიური ფუნქციების ჩვენებას ახდენს. მას აქვს წრიული ეკრანი და შეუძლია ინფორმაციის 360 გრადუსით ჩვენება.
სალონში ყველა მასალას აქვს სპეციალური საფარი სინათლის გარდასახვისთვის, რაც იმას ნიშნავს, რომ სალონის ფერი იცვლება გარემოსა და განათების მიხედვით. კიდევ უფრო მეტი კომფორტისა და მართვის სიამოვნებისთვის, Peugeot-მა შემოგვთავაზა Comfort Fit სავარძლები, რომელთა რეგულირებაც შესაძლებელია თითოეული მგზავრის შესაბამისად. მუსიკის მოყვარულებს დააფასებენ ფრანგული ბრენდის Focal-ის პრემიუმ აუდიო სისტემა.
Peugeot-ის აღმასრულებელი დირექტორის, ლინდა ჯექსონის თქმით, „ელექტრიფიკაცია Peugeot ბრენდისთვის პრიორიტეტულია, ამიტომ 2023 წლისთვის ამ ხაზის ავტომობილების 100% ელექტროფიცირებული იქნება, ხოლო მომდევნო ორი წლის განმავლობაში ხუთი ახალი, სრულად ელექტრო მოდელი გამოვა“.
