სამართალდამცავმა ორგანოებმა სისხლის სამართლის გამოძიების ფარგლებში ფედერალური საბაჟო სამსახურის უფროსის მოადგილე ელენა იაგოდკინა დააკავეს, - ამის შესახებ „ინტერფაქსს“ ინფორმირებულმა წყარომ განუცხადა.
„იაგოდკინა დღეს დილით, ფედერალურ საბაჟო სამსახურში შეხვედრის შემდეგ, საკუთარ კაბინეტში დააკავეს“, - განაცხადა სააგენტოს წყარომ.
მისი თქმით, იაგოდკინას სახლი გაჩხრიკეს და ის მალე დაკითხვაზე წაიყვანენ.
ფედერალური საბაჟო სამსახურის პრესსამსახურს ამ საკითხთან დაკავშირებით კომენტარი ჯერ არ გაუკეთებია.
ფედერალური საბაჟო სამსახურის ვებსაიტზე გამოქვეყნებული ინფორმაციის თანახმად, 48 წლის იაგოდკინა საბაჟოში 1997 წლიდან მუშაობს. ის ფედერალური საბაჟო სამსახურის უფროსის მოადგილედ 2019 წლის 13 სექტემბერს დაინიშნა. მას საბაჟო სამსახურის გენერალ-პოლკოვნიკის წოდება აქვს.
