ადამიანის უფლებათა ევროპულმა სასამართლომ უკრაინის სარჩელი რუსეთის წინააღმდეგ მიიღო. ის ადამიანის უფლებათა ევროპულ სასამართლოში 23 ივნისს შევიდა.
„სახელმწიფოთაშორისი საქმე „უკრაინა რუსეთის წინააღმდეგ (X)“ (განაცხადი №11055/22) ეხება უკრაინის მთავრობის მიერ წაყენებულ ბრალდებებს ადამიანის უფლებების მასობრივი და უხეში დარღვევების შესახებ, რომლებიც ჩაიდინა რუსეთის ფედერაციამ უკრაინის ტერიტორიაზე სამხედრო ოპერაციების დროს 2022 წლის 24 თებერვლიდან“, - ნათქვამია განცხადებაში.
ადამიანის უფლებათა ევროპული სასამართლოს პრეზიდენტმა, რობერტ სპანომ, საქმე სასამართლოს მეოთხე სექციას გადასცა და ამის შესახებ რუსეთს აცნობა.
სასამართლომ დასძინა, რომ ევროკავშირი ამჟამად განიხილავს უკრაინის მიერ რუსეთის წინააღმდეგ შეტანილ ხუთ სახელმწიფოთაშორის სარჩელს. აქედან, სასამართლოში დაახლოებით 8,500 ინდივიდუალური სარჩელია შეტანილი.
სარჩელში უკრაინა რუსეთის ხელისუფლებას ადანაშაულებს ადამიანის უფლებათა ევროპული კონვენციის დარღვევაში უკრაინის სუვერენული ტერიტორიის უკანონოდ შეჭრის გამო. კერძოდ, იგი რუსეთის ხელისუფლებას ადანაშაულებს სიცოცხლის უფლების, წამების აკრძალვის, თავისუფლებისა და უსაფრთხოების უფლების, პირადი და ოჯახური ცხოვრების პატივისცემის უფლების, აზრისა და გამოხატვის თავისუფლების უფლების, შეკრებისა და გაერთიანების თავისუფლების და საკუთრების დაცვის უფლების დარღვევაში.
