ევროპის გენერალურმა სასამართლომ ევროკავშირში RT-ის (ყოფილი Russia Today) მაუწყებლობის აკრძალვა ძალაში დატოვა.
ოთხშაბათს, ლუქსემბურგში RT France-ის სარჩელი, რომელიც მოითხოვდა ევროკავშირის საბჭოს მიერ ეთერიდან მისი დროებით ამოღების გადაწყვეტილების გაუქმებას, უარყოფილ იქნა. მოსამართლეებმა დაადგინეს, რომ ომის გამო სასწრაფოდ მიღებული გადაწყვეტილება გამართლებული იყო, არ ემუქრებოდა მედიის თავისუფლებას და არ არღვევდა RT-ის მოსმენის უფლებას.
მარტში, რუსეთის მიერ უკრაინაში შეჭრიდან მალევე, ევროპის საბჭომ შეზღუდვები დააწესა RT-სა და საინფორმაციო სააგენტო Sputnik-ის მაუწყებლობაზე. საბჭომ განაცხადა, რომ რუსეთის ფედერაცია, ამ მედია საშუალებების მეშვეობით, აწარმოებს „პროპაგანდისტულ კამპანიას, რომელიც ამართლებს უკრაინის წინააღმდეგ აგრესიას და მიზნად ისახავს ევროკავშირის სამოქალაქო საზოგადოებას, უხეშად ამახინჯებს და მანიპულირებს ფაქტებს“.
RT France-მა გადაწყვეტილება გაასაჩივრა და განაცხადა, რომ საბჭოს იურისდიქცია არ გააჩნდა და აკრძალვა გამოხატვის თავისუფლებას არღვევდა.
ფრანგი ევროპარლამენტარი მიიჩნევს, რომ RT და Sputnik პუტინის საომარი მანქანის ნაწილებია და ევროპელებისთვის საფრთხეს წარმოადგენენ:
„მე თავისუფალი სიტყვისა და თავისუფალი მედიის მტკიცე მხარდამჭერი ვარ. თუმცა, RT და Sputnik არ არიან მედია საშუალებები. ისინი ჰიბრიდული ომის იარაღია“, - განაცხადა ნატალი ლუაზომ. „ეს ჩემი სიტყვები არ არის. RT-ის მთავარმა რედაქტორმა არაერთხელ გაიმეორა, რომ ის დემოკრატიების წინააღმდეგ ომის ერთგვარ ინსტრუმენტს იყენებს. ჩვენ კი გვინდა დავიცვათ ჩვენი დემოკრატიები“.
კრემლის პრესმდივანმა სასამართლოს გადაწყვეტილებას ევროპის ქვეყნებში სიტყვისა და მედიის თავისუფლებაზე თავდასხმა უწოდა. „რა თქმა უნდა, ჩვენ ვიღებთ და გავაგრძელებთ მსგავს ზომებს ჩვენს ქვეყანაში მოქმედ დასავლურ მედიასაშუალებებზე ზეწოლის მიზნით“, - განაცხადა დიმიტრი პესკოვმა. „ჩვენ მათ აქ მუშაობის უფლებასაც არ მივცემთ და არანაირი რბილი მიდგომა არ იქნება“.
