BBC News-ის ცნობით, ევროპარლამენტმა ევროკავშირი „ლგბტ თავისუფლების ზონად“ გამოაცხადა.
რეზოლუცია მიღებულ იქნა პოლონეთის ლგბტ თემის მიმართ პოლიტიკის საპასუხოდ. ბოლო წლებში პოლონეთის ადგილობრივი ხელისუფლება საკუთარ თავს „ლგბტ იდეოლოგიისგან თავისუფალ ზონებს“ უწოდებს და ერთსქესიან წყვილებს ბავშვების აყვანას უკრძალავს.
დოკუმენტში ნათქვამია, რომ ევროკავშირის მმართველობის ყველა დონის ხელისუფლებამ უნდა დაიცვას და ხელი შეუწყოს მოქალაქეების, მათ შორის ლგბტ პირების თანასწორობასა და ფუნდამენტურ უფლებებს. რეზოლუციის თანახმად, ევროკავშირში ლგბტ პირებს შეუძლიათ თავისუფლად იცხოვრონ და „საჯაროდ გამოხატონ თავიანთი სექსუალური ორიენტაცია და გენდერული იდენტობა შეუწყნარებლობის, დისკრიმინაციის ან დევნის შიშის გარეშე“.
რეზოლუციას მხარი 492-მა ევროპარლამენტარმა დაუჭირა, 141-მა წინააღმდეგ მისცა ხმა, ხოლო 46-მა თავი შეიკავა.
რეზოლუციის ერთ-ერთმა სპონსორმა, გერმანელმა ევროპარლამენტარმა ტერი რაინკემ, შეაქო „აბსოლუტური უმრავლესობა“. ევროკომისიის პრეზიდენტმა ურსულა ფონ დერ ლაიენმა რეზოლუციას უკვე მხარი დაუჭირა მის ხუთშაბათს წარდგენამდე.
პოლონეთში ერთსქესიანთა ურთიერთობები იურიდიულად არ არის აღიარებული და პოლონეთის მთავრობა ასევე კრძალავს ერთსქესიან წყვილებს ბავშვების აყვანას. ახალი კანონის თანახმად, ხელისუფლება ვალდებული იქნება გადაამოწმოს იმ პირთა პერსონალური მონაცემები, რომლებიც ბავშვის მარტოხელა მშობლად აყვანის მსურველ პირს მიმართავენ. თუ აღმოჩნდება, რომ პირი ერთსქესიანთა ურთიერთობაში მყოფი მარტოხელა მშობლის სტატუსით მიმართავს განაცხადს, მას სისხლის სამართლის პასუხისმგებლობა დაეკისრება.
