შვეიცარიის ქალაქ ლუგანოში გამართული კონფერენციის შემდეგ, ათობით ქვეყანა შეთანხმდა უკრაინისთვის გრძელვადიანი ფინანსური დახმარების გაწევაზე. ერთობლივი დეკლარაცია ითვალისწინებს, რომ დაფინანსების განაწილების პროცესი გამჭვირვალე უნდა იყოს და ხაზს უსვამს კანონის უზენაესობის სისტემატური გაძლიერებისა და კორუფციის აღმოფხვრის აუცილებლობას.
შვეიცარიამ განაცხადა, რომ წლის ბოლომდე უკრაინისთვის დახმარებას 104 მილიონ დოლარამდე გააორმაგებდა. ნორვეგიამ უკრაინას მომდევნო ორი წლის განმავლობაში ერთი მილიარდი ევრო გამოუყო.
ნიდერლანდების საგარეო ვაჭრობის მინისტრმა, ლისე შრაინმახერმა, განაცხადა, რომ უკრაინამ მისი ქვეყნიდან დამატებით 200 მილიონი ევრო მიიღო. „ეს თანხები გამოიყენება უკრაინის მთავრობის ყოველდღიური ხარჯების დასაფარად, როგორიცაა საჯარო მოხელეების, მასწავლებლებისა და ჯანდაცვის მუშაკების ხელფასების გადახდა. ეს ახალი შენატანები ემატება ჩვენს წინა ფინანსურ დახმარებას, რომელმაც 140 მილიონი ევრო შეადგინა“, - განაცხადა მინისტრმა.
უკრაინის მთავრობის შეფასებით, ქვეყნის აღდგენის გეგმის განხორციელებას მინიმუმ 750 მილიარდი დოლარი დასჭირდება
ლიეტუვის პრემიერ-მინისტრმა ინგრიდა შიმონიტემ მხარი დაუჭირა გაყინული რუსული აქტივების გამოყენების იდეას. „პირველ რიგში, ჩვენ უნდა შევქმნათ დაფინანსება. ჩვენ გვჭირდება მეტი სახსრების მოძიება საკუთარ ბიუჯეტებში ან კოლექტიური სესხის აღება. თუმცა, ყველაზე ადეკვატური და სამართლიანი გზაა სანქციებით გაყინული რუსეთის აქტივების კონფისკაცია და გამოყენება. ჩვენ ვერ შევძლებთ რუსეთის მიერ მოკლული ადამიანების გაცოცხლებას, მაგრამ გვაქვს რეალური შანსი, აგრესორს ვაიძულოთ გადაიხადოს, რადგან ეს აქტივები ჩვენს ბანკებშია და ჩვენს სანაპიროებთან არის მიბმული“, - განაცხადა ლიეტუვის პრემიერ-მინისტრმა.
უკრაინის მთავრობა გეგმავს, პრიორიტეტად აქციოს კრიტიკულად მნიშვნელოვანი სამოქალაქო ინფრასტრუქტურის აღდგენა.
რუსეთის სამხედრო აგრესიის შედეგად, ქვეყანაში ასობით საავადმყოფო, სკოლა, საბავშვო ბაღი და ათიათასობით საცხოვრებელი შენობა განადგურდა.
