კანადის საგარეო საქმეთა მინისტრმა მელანი ჟოლიმ განაცხადა, რომ რუსეთსა და დასავლეთს შორის არსებული დაძაბულობის გამოსწორების ერთადერთი სიცოცხლისუნარიანი გზა რუსეთის მიერ ესკალაციის შეჩერება და დიალოგზე დათანხმებაა.
„ევროპული პრავდას“ ცნობით, ამის შესახებ მან უკრაინის საგარეო საქმეთა მინისტრ დმიტრო კულებასთან ერთობლივ პრესკონფერენციაზე განაცხადა.
მელანი ჟოლიმ აღნიშნა, რომ კანადა ღრმად შეშფოთებულია რუსეთის მიერ უკრაინის საზღვრებთან ძალების განლაგებით და მისი დესტაბილიზაციის გამომწვევი ქმედებებით და მისი ვიზიტი კანადის მიერ უკრაინის მიმართ სოლიდარობის გამოხატულებაა.
„არსებობს მხოლოდ ერთი შესაძლო გზა: რუსეთმა უნდა დაიწყოს დეესკალაცია და ჩაერთოს შინაარსიან დიალოგში. მე ეს საკითხი აქ და კოლეგებთან სხვა შეხვედრებზეც წამოვწიე.“.
„ჩვენ გაერთიანებულები ვართ უკრაინის მხარდაჭერაში. უკრაინაში ნებისმიერ შეჭრას სერიოზული შედეგები მოჰყვება, მათ შორის ჩვენი მოკავშირეების მიერ ძალიან სერიოზულ, კოორდინირებულ სანქციებს“, - ხაზგასმით აღნიშნა მელანი ჟოლიმ.
მან დასძინა, რომ კანადა მუშაობს შემაკავებელ ზომებზე, მათ შორის ისეთებზე, რომლებიც აძლიერებს უკრაინის თავდაცვით შესაძლებლობებს, როგორიცაა კანადის ძალების UNIFIER მისია.
შეგახსენებთ, რომ კანადის საგარეო საქმეთა მინისტრი მელანი ჟოლი უკრაინაში პირველად იმყოფება. შემდეგ ის ბრიუსელში გაემგზავრება, სადაც ნატოს გენერალურ მდივანს იენს სტოლტენბერგს და ევროკავშირის უმაღლეს დიპლომატს, ხოსეპ ბორელს შეხვდება, შემდეგ კი პარიზში გაემგზავრება.
მანამდე, მელანი ჟოლიმ არ გამორიცხა უკრაინაში იარაღის გაგზავნის შესაძლებლობა რუსეთთან საზღვარზე დაძაბულობის ფონზე.
