თურქეთში დააკავეს ტერორისტი ბაშარ ხატაბ ღაზალ ალ-სუმაიდაი, კოდური სახელით „აბუ ზეიდი/ოსტატი ზეიდი“ და ISIS-ის ერთ-ერთი ლიდერი. ის ცდილობდა შენიღბვას და კვალის დაფარვას.
CNN Türk-ის ცნობით, თურქეთის პრეზიდენტმა რეჯეფ თაიფ ერდოღანმა ტერორისტული დაჯგუფების ერთ-ერთი ლიდერის დასაკავებლად ჩატარებული სპეცოპერაციის დეტალები გაასაჯაროვა.
სახელმწიფოს მეთაურმა განაცხადა, რომ „აბუ ზეიდი“ უსაფრთხოების გენერალურმა დირექტორატმა, სტამბოლის უსაფრთხოების დირექტორატმა და MIT-ის სტამბოლის რეგიონულმა ოფისმა დააკავეს.
გავრცელებული ინფორმაციით, ტერორისტი შენიღბვის მიზნით პარიკს ატარებდა, თუმცა გამოაშკარავეს და დააკავეს. უცნობია, გეგმავდა თუ არა ის თურქეთში რაიმე ტერორისტულ თავდასხმას.
„ამ ტერორისტის კავშირები სირიასა და სტამბოლში დიდი ხნის განმავლობაში კონტროლდებოდა და მიღებული იქნა დაზვერვის ინფორმაცია მისი თურქეთში უკანონო შესვლის შესახებ. სტამბოლის უსაფრთხოების ძალებმა დაადგინეს, რომ ტერორისტი ყალბ პირადობის მოწმობას იყენებდა და იმალებოდა“, - განმარტა თურქეთის ლიდერმა.
ერდოღანმა დასძინა, რომ ეროვნული დაზვერვის სამსახურისა და სტამბოლის პოლიციის დეპარტამენტის მიერ დაკითხვის შემდეგ, ტერორისტი სასამართლო ხელისუფლებას გადაეცა.
„ოსტატი ზეიდი“ ტერორისტული ორგანიზაცია „ისლამური სახელმწიფოს“ ერთ-ერთ მთავარ ლიდერად ითვლება.
ISIS-მა ადრე აიღო პასუხისმგებლობა ავღანეთის დედაქალაქ ქაბულში აგრესორი ქვეყნის, რუსეთის საელჩოს შესასვლელთან მომხდარ ტერორისტულ თავდასხმაზე, რომელიც 6 სექტემბერს მოხდა.
