რუმინეთი რუსეთის მხრიდან მოლდოვაზე შესაძლო თავდასხმის საფრთხეს ვერ ხედავს.
ამის შესახებ რუმინეთის საგარეო საქმეთა მინისტრმა ბოგდან აურესკუმ განაცხადა, წერს NewsMaker.
„ომი, რომელსაც რუსეთი მეზობელ ქვეყანაში აწარმოებს, წარუმატებელია. ჩვენ ვხედავთ, რომ რუსეთი თავდაცვით პოზიციას იკავებს, ხოლო უკრაინა შედარებით კარგ შედეგებს აჩვენებს სამხედრო ოპერაციების თეატრში. შესაბამისად, მე არ მჯერა ისეთი კონსტრუქციების, რომლებიც ამჟამად მოლდოვას საფრთხეს შეუქმნის“, - თქვა აურესკუმ.
მინისტრმა დასძინა, რომ ის „ჰიპოთეტურ სიტუაციებზე სპეკულაციას არ აკეთებდა“, თუმცა, ამ ეტაპზე, მის ხელთ არსებული ინფორმაციის საფუძველზე, მოლდოვას არანაირი საფრთხე არ ემუქრება. თუმცა, აურესკუმ განაცხადა, რომ თუ ასეთი სიტუაცია „შესაძლებელი“ გახდება, რუმინეთის ხელისუფლება აუცილებელ ზომებს მოლდოვას მთავრობასთან განიხილავს.
„თუმცა, ამჟამად ჩვენ არ გვაქვს ინფორმაცია მოლდოვასთვის ამ ტიპის რისკების შესახებ“, - განმარტა ოფიციალურმა პირმა.
შეგახსენებთ, რომ ორშაბათს, 19 დეკემბერს, მოლდოვას ინფორმაციული უსაფრთხოების სამსახურის (SIS) ხელმძღვანელმა, ალექსანდრუ მუსტეატამ განაცხადა, რომ რუსეთი მომავალ წელს მოლდოვაში შეჭრას გეგმავს.
თუმცა, მოგვიანებით, SIS-მა განმარტა, რომ ალექსანდრუ მუსტეატა არ გულისხმობდა რუსეთის თავდასხმას მოლდოვაზე, არამედ რუსეთის არმიის ახალ მცდელობას, უკრაინის გავლით დნესტრისპირეთში „სახმელეთო დერეფნის“ შექმნის შესახებ.
