კიევში შედუღების სამუშაოების დროს ბენზინგასამართი სადგური აფეთქდა, რის შედეგადაც ერთი ადამიანი დაიღუპა, მეორე კი საავადმყოფოში გადაიყვანეს.
„დილის 9:32 საათზე კიევის პოლიციის სამორიგეო განყოფილებაში შევიდა შეტყობინება ვისკოზნას ქუჩაზე მდებარე სავაჭრო ცენტრში ცისტერნის აფეთქების შესახებ. წინასწარი მონაცემებით, ცისტერნა შედუღების სამუშაოების შედეგად აფეთქდა. შედეგად, ხერსონის ოლქიდან 52 წლის მამაკაცი ადგილზე გარდაიცვალა, ხოლო 33 წლის მამაკაცი დაზიანებებით საავადმყოფოში გადაიყვანეს“, - იტყობინება კიევის პოლიციის პრესსამსახური.
შემთხვევის ადგილზე პოლიციის თანამშრომლები ატარებენ პირველად საგამოძიებო მოქმედებებს და ადგენენ ინციდენტის გარემოებებს.
ამჟამად მიმდინარეობს გამოძიება, რომლის შედეგების საფუძველზეც ამ მოვლენას მიენიჭება იურიდიული კლასიფიკაცია.
