ლიეტუვის რკინიგზამ სამშაბათს დაადასტურა, რომ რუსეთიდან კალინინგრადში სანქცირებული საქონლის გადატანით პირველმა მატარებელმა უკვე გადაკვეთა ლიეტუვა და დანიშნულების ადგილამდე მიაღწია.
ამის შესახებ გამოცემა „ევროპული პრავდა“ „დელფიზე“ დაყრდნობით იტყობინება.
„კალინინგრადისკენ მიმავალი პირველი მატარებელი უკვე გავიდა და დღეს (26 ივლისს) მეორე შემოწმდა საბაჟოზე“, - განაცხადა სამშაბათს LS-ის კომუნიკაციების დეპარტამენტის ხელმძღვანელმა მანტას დუბაუსკასმა.
ლიტვის საბაჟო დეპარტამენტის წარმომადგენლის, ლინა ლაურინაიტიტე-გრიგიენეს თქმით, სამშაბათს კიანას სასაზღვრო პუნქტზე დასრულდა ცემენტის ტვირთით დატვირთული ხუთი ვაგონის მეორე მატარებლის შემოწმება და მას კალინინგრადში შესვლის ნებართვა მიეცა.
„ის უკვე შემოწმდა და წავიდა“, - განაცხადა ლაურინაიტიტე-გრიგიენემ სამშაბათს.
ლიეტუვის რკინიგზამ ადრე განაახლა ევროკავშირის სანქციების სიაში შეტანილი საქონლის ტრანზიტი რუსეთის კალინინგრადის რეგიონში.
შეგახსენებთ, რომ 13 ივლისს ევროკომისიამ გამოაქვეყნა დამატებითი სახელმძღვანელო მითითებები ევროკავშირის წევრი სახელმწიფოებისთვის რუსეთიდან საქონლის ტრანზიტთან დაკავშირებით, რომლითაც ნებადართულია გარკვეული სანქცირებული საქონლის კალინინგრადის რეგიონში რკინიგზით გადატანა.
რუსეთის წინააღმდეგ ევროკავშირის სანქციების მეხუთე პაკეტის გარდამავალი პერიოდის დასრულების შემდეგ, ლიეტუვის გავლით აიკრძალა ცემენტის, სპირტის, ხის, მინის, ალუმინის, ქაღალდის ნაწარმის, თაბაშირის და რუსული წარმოშობის სხვა საქონლის ტრანსპორტირება. ლიეტუვამ ადრე შეზღუდა ფოლადის და შავი ლითონების ტრანზიტი კალინინგრადის რეგიონში ევროკავშირის სანქციების გამო.
