გერმანია რუსეთის საელჩოს თანამშრომლების მნიშვნელოვან ნაწილს გააძევებს ბუჩაში რუსი ოკუპანტების მიერ ჩადენილი სისასტიკეების საპასუხოდ.
ამის შესახებ გერმანიის საგარეო საქმეთა მინისტრმა, ანალენა ბერბოკმა განაცხადა.
„ბუჩადან გადაღებული ფოტოები აჩვენებს განადგურების სურვილს, რომელიც ყველა საზღვარს სცილდება. ამიტომ, ჩვენ რუსეთის საელჩოს პერსონალის მნიშვნელოვანი რაოდენობა არასასურველად გამოვაცხადეთ. ჩვენ კიდევ უფრო გავამკაცრებთ რუსეთის წინააღმდეგ არსებულ სანქციებს, გადამწყვეტად გავაფართოვებთ უკრაინის შეიარაღებული ძალების მხარდაჭერას და გავაძლიერებთ ნატოს აღმოსავლეთ ფლანგს“, - განაცხადა ბერბოკმა.
„დერ შპიგელის“ ცნობით, ორშაბათს შუადღისას, ფედერალურმა საგარეო საქმეთა სამინისტრომ რუსეთის ელჩი სერგეი ნეჩაევი დაიბარა და აცნობა, რომ 40 რუსი დიპლომატი არასასურველად გამოცხადდა. მათ გერმანია მომდევნო ხუთი დღის განმავლობაში უნდა დატოვონ.
მარტის შუა რიცხვებში გერმანიის სადაზვერვო სამსახურებმა შეადგინეს რუსი დიპლომატების სიები, რომლებიც პირდაპირ ან ირიბად მუშაობდნენ გერმანიაში სხვადასხვა რუსული სადაზვერვო სააგენტოებისთვის.
