Telegram-ის არხის „ვიკი ნოვოსტი“-ს ცნობით, ვიკიპედიის რუსული იურიდიული პირის, WikiMedia-ს დირექტორი, ვლადიმერ მედეიკო თანამდებობიდან გაათავისუფლეს. ის ასევე გარიცხეს პარტნიორობიდან და სამუდამოდ დაიბლოკა თავად ვიკიპედიიდან. ეს გადაწყვეტილება მას შემდეგ მიიღეს, რაც მედეიკოს კოლეგებმა აღმოაჩინეს, რომ ის ფარულად მონაწილეობდა რუსული ცენზურის ქვეშ მყოფი „რუსული ვიკიპედიის“ შექმნაში.
Wikimedia RU-ს აღმასრულებელმა დირექტორმა, სტანისლავ კოზლოვსკიმ, ადრე RTVI-ს განუცხადა, რომ მედეიკოს შესაძლო გათავისუფლების საკითხი საერთო კრებაზე განიხილებოდა. მან თქვა, რომ რუვიკას მზადების შესახებ ამბავი მისთვის მოულოდნელი იყო.
„ნებისმიერს შეუძლია საკუთარი პროექტების შექმნა; ამის გაკეთება არავის ეკრძალება. ნებისმიერს შეუძლია ვიკიპედიის კონტენტის აღება და გამოყენება; ეს სრულიად ნორმალურია. არ არის ნორმალური Wikimedia RU-ს დირექტორის უფლებამოსილების გამოყენება ამისათვის და ამის სრულიად საიდუმლოდ კეთება რამდენიმე წლის განმავლობაში. ჩემი აზრით, ეს არც ისე კარგია“, - თქვა კოზლოვსკიმ.
Wikimedia RU-ს წარმომადგენელმა Gazeta.ru-ს განუცხადა, რომ კომპანიის კიდევ ერთი თანამშრომელი მუშაობდა Wikipedia-ს რუსულ ეკვივალენტზე, თუმცა მისი ვინაობა არ დაუსახელებია.
რუსული ვიკიპედიის ეკვივალენტის შექმნის შესახებ თავის Telegram არხზე სახელმწიფო დუმის დეპუტატმა ანტონ გორელკინმაც დაწერა. მან განაცხადა, რომ Ruviki რუსულ სერვერებზე განთავსდება და მას რუსული იურიდიული პირი მართავს და სრულად დაიცავს რუსეთის კანონმდებლობას.
„ჩვენ ბევრი ვისაუბრეთ ვლადიმერ მედეიკოსთან, რომელიც ხელმძღვანელობდა Wikimedia RU არაკომერციულ პარტნიორობას და ამჟამად Ruwiki-ს ინტერნეტ ენციკლოპედიის ავტონომიური არაკომერციული ორგანიზაციის ხელმძღვანელის თანამდებობას იკავებდა... ჩვენ უნდა შევაფასოთ, თუ როგორ გაუმკლავდება Ruwiki-ს გუნდი ვიკიპედიის კონტენტის ყალბი ინფორმაციისა და აშკარა ტყუილისგან გაწმენდის ამოცანას და რა წყაროებს გამოიყენებენ ამისთვის“, - ნათქვამია პოსტში.
რუსეთის ხელისუფლებამ არაერთხელ გამოთქვა შეშფოთება ვიკიპედიის შინაარსთან დაკავშირებით. მაგალითად, როსკომნადზორმა ენციკლოპედია ბავშვთა პორნოგრაფიის გავრცელებაში დაადანაშაულა და ვლადიმერ პუტინის შესახებ მასალების ამოღება მოითხოვა. რუსეთის არმიის შესახებ „ყალბი ამბების“ გავრცელებაში ბრალდების შემდეგ, ვიკიპედია 2 მილიონი რუბლით დაჯარიმდა.
