დიდმა ბრიტანეთმა სანქციები დაუწესა მოსკოვისა და სრულიად რუსეთის პატრიარქ კირილეს „რუსეთის მიერ უკრაინის წინააღმდეგ სამხედრო აგრესიის აქტიური მხარდაჭერისთვის“, - ნათქვამია მთავრობის ოფიციალურ განცხადებაში.
საგარეო საქმეთა მინისტრმა ლიზ ტრასმა განმარტა, რომ რუსეთის მართლმადიდებლური ეკლესიის მეთაურმა, „როგორც პუტინის დიდი ხნის მოკავშირემ, ბოროტად გამოიყენა თავისი თანამდებობა ომის გასამართლებლად“.
რუსეთის მართლმადიდებლურმა ეკლესიამ ეს გადაწყვეტილება შეაფასა, როგორც „აბსურდული“, „კონტრპროდუქტიული“ და „ევროპულ საზოგადოებასა და რუსეთს შორის განხეთქილების ხელშემწყობი“.
შეზღუდვების ქვეშაა რუსეთის ფედერაციის პრეზიდენტის ბავშვთა უფლებების კომისარი, მარია ლვოვა-ბელოვა. მას ბრალად ედება „ასობით უკრაინელი ბავშვის იძულებით გაყვანა და მათი შვილად აყვანის ორგანიზება“.
შავ სიაში ასევე შედიან რუსეთის შეიარაღებული ძალების 64-ე ცალკეული მოტორიზებული მსროლელი ბრიგადის ოთხი პოლკოვნიკი, რომლებსაც ლონდონი ბუჩაში ჩადენილ ომის დანაშაულებში ადანაშაულებს.
ზემოაღნიშნულ პირებს ეკრძალებათ გაერთიანებულ სამეფოში შესვლა და მათი აქტივები ბრიტანეთის იურისდიქციაში გაყინულია.
