ევროპის ქალაქებში უკრაინის, კერძოდ კი მარიუპოლში აზოვსტალის ფოლადის ქარხნის დამცველების მხარდასაჭერად დემონსტრაციები და მსვლელობები გაიმართა.
ჩეხეთის დედაქალაქ პრაღაში დემონსტრანტებმა აზოვის ბატალიონის ჯარისკაცების ევაკუაცია და მათი ოჯახებისთვის დახმარება მოითხოვეს. მათ ხელში ეჭირათ უკრაინის დროშები და ბანერები სლოგანებით, როგორიცაა „გადავარჩინოთ მარიუპოლი“ და „ისინი ცოცხლები უნდა დარჩნენ“.
მარიუპოლის თავდაცვის უკანასკნელ დასაყრდენს, აზოვსტალის ციხესიმაგრეში, რამდენიმე ასეული ჯარისკაცი რჩება, რაც რუსულ ჯარებს ქალაქის სრული კონტროლის აღებაში ხელს უშლის.
ათობით დემონსტრანტი ასევე გამოვიდა თურქეთის უდიდესი ქალაქის, სტამბოლის ქუჩებში. მათ პრეზიდენტ რეჯეფ თაიფ ერდოღანს მოუწოდეს, აზოვსტალიდან ყველა უკრაინელი ჯარისკაცი გაიყვანოს.
ადრე გავრცელდა ინფორმაცია, რომ კიევი ფოლადის ქარხანაში განლაგებული 60 მძიმედ დაჭრილი ჯარისკაცის ევაკუაციაზე მოლაპარაკებებს აწარმოებდა. მომიტინგეები ასევე მოითხოვდნენ რუსეთისთვის ნავთობის ემბარგოს დაწესებას.
