Քաղաք մուտքը կլինի վճարովի և կարժենա 3-ից 10 եվրո՝ կախված տարվա եղանակից։.
2023 թվականի հունվարից սկսած՝ Իտալիայի Վենետիկ քաղաքում զբոսաշրջիկներից վճար կգանձվի այցելելու համար։ Սա քաղաքը դարձնում է աշխարհում առաջինը, որը կիրառում է նման կանոն։.
Այս որոշումը հրապարակել է Վենետիկի քաղաքային խորհուրդը, հաղորդում է «Եվրոպական պրավդան»։.
Վենետիկի քաղաքային խորհրդի կողմից կայացված որոշման համաձայն՝ քաղաք մուտք գործելու համար 2023 թվականի հունվարի 16-ից կգանձվի վճար, որը կկազմի 3-ից 10 եվրո՝ կախված տարվա եղանակից։.
Քաղաքում կլինեն նաև լիազորված տեսուչներ, որոնք իրավունք կունենան կանգնեցնել զբոսաշրջիկներին և պահանջել մուտքի վճարի ապացույց: Վենետիկ այցելողները կտուգանվեն խախտումների համար:.
Հավաքված միջոցները կօգտագործվեն Վենետիկում աղբահանության ծախսերի կրճատման համար, քանի որ քաղաքում այս կոմունալ ծառայության արժեքն ավելի բարձր է, քան Իտալիայի մյուս քաղաքներում։.
Մինչդեռ, Վենետիկում մեկ գիշեր անցկացրող զբոսաշրջիկները, ինչպես նաև քաղաքի բնակիչները և նրանց հյուրերը կարող են օգտվել անվճար մուտքից։ Նրանք կարող են ներբեռնել վկայականը հատուկ հարթակից, որը պատրաստ կլինի մինչև 2022 թվականի վերջը։.
«Նպատակն է տարվա որոշակի ժամանակահատվածներում կանխել մեկօրյա զբոսաշրջությունը և խրախուսել բազմօրյա զբոսաշրջությունը՝ համապատասխան քաղաքի նրբագեղությանը և յուրահատկությանը», - բացատրել են Վենետիկի քաղաքային խորհուրդում։.
Հիշեցնենք, որ անցյալ տարի Իտալիան արգելեց խոշոր զբոսաշրջային նավերի մուտքը Վենետիկի ծովածոց՝ տարածքը գերզբոսաշրջությունից պաշտպանելու նպատակով։.
