Իսրայելցի գիտնականները գիտության մեջ առաջընթաց են գրանցել՝ ստեղծելով «սինթետիկ սաղմեր», հաղորդում է Tengrinews.kz-ն՝ հղում անելով WIONews-ին։.
Իսրայելի Վեյցմանի գիտության ինստիտուտի գիտնականները իրենց հետազոտության ընթացքում պարզել են, որ մկան ցողունային բջիջները կարող են ինքնաբերաբար հավաքվել՝ ստեղծելով վաղ սաղմնանման կառուցվածքներ՝ աղիքային տրակտով, ուղեղի տարրական մասերով և սրտով։ Նրանց ստեղծած սաղմերը կոչվել են «սինթետիկ», քանի որ դրանց առաջացման համար բեղմնավորված ձվաբջիջներ չեն պահանջվում։.
«Մենք ցույց ենք տալիս, որ սաղմնային ցողունային բջիջները առաջացնում են ամբողջական «սինթետիկ սաղմեր», այդ թվում՝ պլասենտան և սաղմը շրջապատող դեղնուցապարկը», - ասել է ուսումնասիրության ղեկավար պրոֆեսոր Ջեյքոբ Հաննան։.
Գիտնականները բացատրեցին, որ որոշ բջիջներ նախնական մշակվել են քիմիական նյութերով, որոնք միացրել են գենետիկական ծրագրերը՝ դրանք վերածելով պլասենցայի կամ դեղնուցապարկի, մինչդեռ մյուսները զարգացել են առանց միջամտության։.
Ցողունային բջիջների մեծ մասը չկարողացավ ձևավորել սաղմնանման կառուցվածքներ, սակայն մոտ 0.5 տոկոսը միաձուլվեց՝ վերածվելով փոքր գնդիկների, որոնք աճեցին՝ դառնալով առանձին հյուսվածքներ և օրգաններ: «Սինթետիկ սաղմերի» բջիջների ներքին կառուցվածքը և գենետիկական պրոֆիլները 95 տոկոսով նույնական էին բնական մկան սաղմերի հետ:.
Ակնկալվում է, որ այս հայտնագործությունը կօգնի ավելի լավ հասկանալ օրգանների և հյուսվածքների ձևավորման գործընթացը բնական սաղմերի զարգացման ընթացքում: Հետազոտողները նաև կարծում են, որ իրենց աշխատանքը կնվազեցնի կենդանիների վրա փորձերի անհրաժեշտությունը և, ի վերջո, կհարթի ճանապարհ մարդկային փոխպատվաստման համար բջիջների և հյուսվածքների նոր աղբյուրների համար: Օրինակ, տեխնոլոգիան կարող է օգտագործվել մաշկի բջիջները ոսկրածուծի ցողունային բջիջների վերածելու համար՝ լեյկեմիայի բուժման համար:.
Նախկինում գիտնականներն առաջին անգամ ցույց էին տվել արգանդի փոխպատվաստման արդյունավետությունը անպտղության բուժման համար։.
