Կանադացի ռեժիսոր Դանիել Ռոերի «Նավալնի» ֆիլմը արժանացել է «Օսկար» մրցանակի՝ որպես լավագույն վավերագրական ֆիլմ։.
«Ես կցանկանայի այս մրցանակը նվիրել Նավալնիին և աշխարհի բոլոր քաղբանտարկյալներին։ Ալեքսեյ, աշխարհը չի մոռացել քո կարևոր ուղերձը՝ մենք չենք կարող և չպետք է վախենանք դիմադրել բռնապետերին և ավտորիտարիզմին», - ասաց ռեժիսոր Դանիել Ռոերը «Օսկար» մրցանակը ստանալուց հետո։.
Մրցանակաբաշխության արարողության ժամանակ նա երախտագիտություն հայտնեց քննիչներ Խրիստո Գրոզևին և Մարիա Պևչիխին, ինչպես նաև Ալեքսեյ Նավալնիի ընտանիքին։ Նրանք բոլորը ներկա էին բեմում։.
Մրցանակաբաշխության ժամանակ ելույթ ունեցավ նաև ռուս քաղբանտարկյալի կինը՝ Յուլիա Նավալնայան։ «Իմ ամուսինը բանտում է միայն ճշմարտությունն ասելու համար։ Իմ ամուսինը բանտում է միայն ժողովրդավարությունը պաշտպանելու համար։ Ալեքսեյ, ես երազում եմ այն օրվա մասին, երբ դու ազատ կլինես, և մեր երկիրն էլ ազատ կլինի։ Համբերիր, սիրելիս», - ասաց նա։.
«Նավալնի» վավերագրական ֆիլմը պատմում է ռուս ընդդիմադիր քաղաքական գործիչ և կոռուպցիայի դեմ պայքարի հիմնադրամի հիմնադիր Ալեքսեյ Նավալնիի և 2020 թվականի օգոստոսին նրա թունավորման, բուժման և Ռուսաստան վերադառնալու շուրջ ծավալված իրադարձությունների մասին, որտեղ նա անմիջապես բանտարկվել է։.
«Նավալնի» ֆիլմը նաև այլ կինոմրցանակների է արժանացել։ Օրինակ՝ փետրվարին ֆիլմը Բրիտանական կինոյի և հեռուստատեսային արվեստների ակադեմիայի (BAFTA) կողմից ստացել է BAFTA մրցանակ։.
