Հիմնադրամը կոչ արեց անհապաղ դադարեցնել կրակը և հարգել միջազգային մարդասիրական իրավունքի պարտավորությունները՝ երեխաներին պաշտպանելու համար։.
ՄԱԿ-ի մանկական հիմնադրամը (ՅՈՒՆԻՍԵՖ) դատապարտում է մարտի 9-ին Դոնեցկի մարզի Մարիուպոլ քաղաքի ծննդատան վրա կատարված հարձակումը։.
Այս մասին հայտնել է հիմնադրամի մամուլի ծառայությունը, հաղորդում է «Ազատություն» ռադիոկայանը։.
«Ես ցնցված եմ Մարիուպոլի ծննդատան վրա այսօրվա հարձակման լուրից։ Ըստ որոշ տեղեկությունների՝ հարձակման հետևանքով ավերված շենքերի փլատակների տակ են մնացել փոքր երեխաներ և ծննդաբերող կանայք… Քաղաքացիական բնակչության և քաղաքացիական ենթակառուցվածքների, մասնավորապես՝ հիվանդանոցների, ջրամատակարարման համակարգերի և դպրոցների վրա հարձակումները անընդունելի են և պետք է անհապաղ դադարեցվեն։ ՅՈՒՆԻՍԵՖ-ը վերահաստատում է իր կոչը՝ անհապաղ դադարեցնել կրակը և կոչ է անում պահպանել միջազգային մարդասիրական իրավունքի շրջանակներում երեխաներին պաշտպանելու պարտավորությունները, ինչպես նաև մարդասիրական կազմակերպություններին հնարավորություն տալ անվտանգ և արագորեն հասանելիություն ունենալ կարիքավոր երեխաներին», - ասել է ՅՈՒՆԻՍԵՖ-ի գործադիր տնօրեն Քեթրին Մ. Ռասելը։.
Իր հայտարարության մեջ նա հավելել է. «Ուկրաինայի երեխաներին անհապաղ խաղաղություն է պետք»։.
Ինչպես հաղորդել է ՈւՆԻԱՆ-ը, մարտի 9-ին Մարիուպոլի վրա ռուսական օդային հարվածի ժամանակ ոչնչացվել է քաղաքի կենտրոնում գտնվող ծննդատունը, ինչպես նաև հիվանդանոցը, մանկական բաժանմունքը և թերապիայի բաժանմունքը։.
Հարձակման հետևանքով վիրավորվել է 17 մարդ։.
