Մինսկի քաղաքային դատարանում սկսվել է նախագահի նախկին թեկնածու Սվետլանա Տիխանովսկայայի և ընդդիմության համակարգող խորհրդի մյուս առաջնորդների դատավարությունը։ Նրանց հեռակա մեղադրանք է առաջադրվել մի շարք քրեական հանցագործությունների համար, այդ թվում՝ դավաճանության, ծայրահեղականության և ազգային անվտանգության խաթարման մեջ։.
Սվետլանա Տիխանովսկայան ինքը Դավոսում է։ Նա հայտարարել է, որ չի ճանաչում դատարանը։
«Նախևառաջ, ես կասեի, որ այս այսպես կոչված դատավարությունը որևէ կապ չունի մեր երկրի արդարադատության հետ։ Այս բոլոր դատավարությունները վրեժխնդրություն են նրանց նկատմամբ, ովքեր դեմ են Լուկաշենկոյի ռեժիմին կամ պատերազմին։ <…> Հետևաբար, ես անպայման ոչ մի լավ բան չեմ սպասում։ Ես կդատապարտվեմ երկարատև ազատազրկման։ Դատավորը ինձ կտա այնքան տարի, որքան կորոշի»։.
Բելառուսի դատախազությունը մեղադրում է ընդդիմության համակարգող խորհրդի առաջնորդներին զանգվածային անկարգություններ կազմակերպելու, շենքեր գրավելու և հակասահմանադրական իշխանափոխություն կազմակերպելու մեջ։ Միասին նրանց սպառնում է տասնամյակների ազատազրկում։.
Դատավարությունն ընթանում է դռնփակ, և, ըստ Տիխանովսկայայի, ինքը չի կարողանում ստանալ գործի նյութերը։ Ավելին, նախկին նախագահի թեկնածուն նշել է, որ իրեն նշանակված փաստաբանը չի կապվել իր պաշտպանյալի հետ, և պարզ չէ, թե ինչպես է նա ներկայացնելու իր շահերը։.
Միաժամանակ, բելառուսական դատարաններում ընթանում են լրագրողների և ակտիվիստների այլ աղմկահարույց դատավարություններ, այդ թվում՝ Լյուդմիլա Չեկինայի և Tut.by պորտալի գլխավոր տնօրեն և գլխավոր խմբագիր Մարինա Զոլոտովայի, ինչպես նաև «Վիասնա» մարդու իրավունքների կենտրոնի ղեկավարների, այդ թվում՝ Նոբելյան խաղաղության մրցանակի դափնեկիր Ալես Բյալյացկու դատավարությունները։.
