Հաագայի Միջազգային քրեական դատարանը (ՄՔԴ) ձերբակալման օրդեր է տվել Ռուսաստանի նախագահ Վլադիմիր Պուտինի և Ռուսաստանի երեխաների իրավունքների պաշտպան Մարիա Լվովա-Բելովայի նկատմամբ։ Այս մասին հաղորդվել է դատարանի կայքում։.
Միջազգային քրեական դատարանը նշում է, որ «Վլադիմիր Վլադիմիրովիչ Պուտինը մեղադրվում է երեխաների անօրինական արտաքսման և Ուկրաինայի [վերահսկողության տակ գտնվող] տարածքներից Ռուսաստանի Դաշնություն երեխաների անօրինական տեղափոխման ռազմական հանցագործության մեջ»։ Դատարանի կայքում տեղադրված հայտարարության համաձայն՝ Մարիա Լվովա-Բելովան նույնպես կասկածվում է այս գործում։.
«Կան հիմնավոր հիմքեր ենթադրելու, որ յուրաքանչյուր կասկածյալ պատասխանատու է բնակչության անօրինական տեղահանության ռազմական հանցագործության համար», - նշել է ՄՔԴ-ն։.
Ռուսաստանի արտաքին գործերի նախարարության խոսնակ Մարիա Զախարովան իր Telegram ալիքում գրել է, որ Միջազգային քրեական դատարանի որոշումները «մեր երկրի համար որևէ նշանակություն չունեն, այդ թվում՝ իրավական տեսանկյունից»։.
«Ռուսաստանը Միջազգային քրեական դատարանի Հռոմի կանոնադրության կողմ չէ և դրա շրջանակներում որևէ պարտավորություն չունի։ Ռուսաստանը չի համագործակցում այս մարմնի հետ, և Միջազգային դատարանի կողմից տրված ցանկացած ձերբակալման օրդեր մեզ համար իրավաբանորեն անվավեր կլինի», - ընդգծեց նա։.
Սենատոր Անդրեյ Կլիշասը նույնպես իր Telegram ալիքում գրել է, որ ՄՔԴ-ի որոշումը «իրավական հիմք կամ հետևանքներ չունի»։ «Ներկայումս ոչ միայն Ռուսաստանը, այլև ՄԱԿ-ի Անվտանգության խորհրդի մի շարք անդամ պետություններ չեն ճանաչում ՄՔԴ-ի իրավասությունը։ Նման աբսուրդային որոշում կայացնելով՝ ՄՔԴ-ն ինքնաոչնչացման ուղի է ընտրել», - նշել է նա։.
