Սեպտեմբերի 14-ին Լեհաստանի Սեյմը բանաձև ընդունեց Երկրորդ համաշխարհային պատերազմի ժամանակ պատճառված վնասի համար Գերմանիայի կողմից վճարվող փոխհատուցման վերաբերյալ։.
Փաստաթղթին կողմ է քվեարկել 418 պատգամավոր, դեմ՝ ընդամենը 4, ևս 15-ը ձեռնպահ են մնացել։.
Այս մասին հաղորդում է «Լեհաստան» ռադիոն։ Բանաձևի նախագիծը ներկայացրել են «Իրավունք և արդարադատություն» (PiS) պահպանողական քաղաքական կուսակցության պատգամավորները։ Նրանք կոչ են արել Գերմանիայի կառավարությանը ստանձնել քաղաքական, պատմական, իրավական և ֆինանսական պատասխանատվություն Լեհաստանին պատճառված հետևանքների համար, որոնք առաջացել են նացիստական Գերմանիայի կողմից Երկրորդ համաշխարհային պատերազմի հրահրման հետևանքով։.
Բանաձևում նշվում է, որ Լեհաստանը երբեք որևէ փոխհատուցում չի ստացել Գերմանիայից անձնական կամ նյութական վնասների համար։ Սակայն պատգամավորները շեշտեցին, որ Վարշավան երբեք չի հրաժարվել այդ պահանջներից։.
Նշենք, որ «Իրավունք և արդարադատություն» քաղաքական կուսակցության ղեկավար Յարոսլավ Կաչինսկին վերջերս հայտարարել էր, որ Գերմանիայից փոխհատուցման չափը պետք է կազմի 1.3 տրիլիոն դոլար։.
Լեհաստանի վարչապետ Մատեուշ Մորավեցկին վստահեցրել է, որ Լեհաստանը պնդելու է, որ Գերմանիան փոխհատուցում վճարի Երկրորդ համաշխարհային պատերազմի ժամանակ նացիստների կողմից հասցված հանցագործությունների և վնասի համար։.
«Մենք Գերմանիայից փոխհատուցում ենք ուզում, քանի որ միայն նման հիմքի վրա կարող ենք կառուցել ապագան։ Մեր նախնիների հոգիները, որոնք սարսափելի հանգամանքներում զոհվեցին գերմանացի օկուպանտների ձեռքով, աղաղակում են ճշմարտության, արդարության և փոխհատուցման համար», - հայտարարեց Մորավեցկին։.
Վերջերս Գերմանիայի կանցլեր Օլաֆ Շոլցը հեռացել է իր սովորական հավատարմության հռետորաբանությունից և բավականին կոշտ կարծիքներ է հայտնել ժամանակակից Ռուսաստանի իդեալների վերաբերյալ։ Քաղաքական գործիչը համեմատել է Հիտլերի Գերմանիան ԽՍՀՄ-ում Ստալինի ռեժիմի հետ՝ դրանք որակելով որպես նույն բնույթի չարիքներ։.
