Լեհաստանը կշարունակի առաջատար դեր խաղալ Ուկրաինային ռազմական աջակցության հարցում, այդ թվում՝ անհրաժեշտ տանկեր ուղարկելու հարցում։ Այս մասին հայտարարել է Լեհաստանի նախագահ Անջեյ Դուդան Շվեյցարիայի Դավոս քաղաքում ընթացող Համաշխարհային տնտեսական ֆորումում Euronews-ին տված հարցազրույցում։.
Այնտեղ նա մասնակցեց Եվրոպայի և աշխարհի անվտանգության հարցերի վերաբերյալ մի քանի քննարկումների և ներկա գտնվեց Ուկրաինայի տանը Ռուսաստանի կողմից Ուկրաինայում կատարված ռազմական հանցագործությունների վերաբերյալ ցուցահանդեսի բացմանը։.
Անջեյ Դուդա, Լեհաստանի նախագահ. «Մենք այժմ մեր «Լեոպարդ» տանկերը մեր ստորաբաժանումներից կտեղափոխենք Ուկրաինա՝ միաժամանակ, իհարկե, արդիականացնելով մեր բանակը և հոգ տանելով մեր սեփական անվտանգության մասին, քանի որ մենք հասկանում ենք, որ սա մեր պարտականությունն է՝ որպես լեհական իշխանություններ»։.
Դավոսում Լեհաստանը կրկին կոչ արեց իր արևմտյան գործընկերներին ավելացնել Ուկրաինային տրվող ռազմական աջակցությունը։.
Անջեյ Դուդա. «Մենք մանրամասնորեն խոսել ենք Լեհաստանի նախաձեռնության մասին՝ Ուկրաինա ուղարկել «Լեոպարդ» տանկեր, որպեսզի տարբեր երկրների դաշնակից ուժերի օգնությամբ կարողանանք հավաքել այդ «Լեոպարդ» տանկերը և ստեղծել առնվազն մեկ զրահատանկային բրիգադ Ուկրաինայի համար։ Հետևաբար, Մեծ Բրիտանիայի հայտարարությունը «Չելենջեր 2» տանկերի վերաբերյալ նույնպես նշանակալից է»։.
