Իրանի Արևմտյան Ադրբեջան նահանգում դատարանը երկու ԼԳԲՏ ակտիվիստների մահապատժի է դատապարտել «Երկրի վրա անբարոյականություն տարածելու» համար։.
Այս մասին հայտնել է BBC-ն՝ հղում անելով քրդական Hengaw մարդու իրավունքների կազմակերպությանը: Սրանք Իրանի պատմության մեջ կանանց նկատմամբ կայացված առաջին մահապատիժներն են՝ հիմնված նրանց սեռական կողմնորոշման վրա, նշում են մարդու իրավունքների պաշտպանները: Նրանք կոչ են արել միջազգային հանրությանը չեղյալ հայտարարել դատավճիռները, ըստ Meduza-ի:.
Մարդու իրավունքների պաշտպանների տվյալներով՝ 31-ամյա Զառա Սեդիղի Համեդանին և 24-ամյա Էլհամ Չուբդարը մահվան են դատապարտվել օգոստոսի վերջին կամ սեպտեմբերի սկզբին Ումրիա քաղաքում։ «ԼԳԲՏ քարոզչությունից» բացի, նրանք մեղադրվել են «քրիստոնեություն տարածելու» և «Իսլամական Հանրապետությանը հակառակվող լրատվամիջոցների հետ շփվելու» մեջ։.
Զառա Սեդիղի Համեդանին ձերբակալվել է 2021 թվականի հոկտեմբերի վերջին՝ Թուրքիա մեկնելու փորձի ժամանակ։ Հաջորդ երկու ամիսները նա անցկացրել է Իսլամական հեղափոխության պահապանների կորպուսի կողմից կառավարվող նախնական կալանքի կենտրոնում, որից հետո տեղափոխվել է կանանց բանտ։ Մարդու իրավունքների պաշտպանները նշում են, որ կալանքի ընթացքում նրան զրկել են փաստաբանի հետ կապ հաստատելու հնարավորությունից և ենթարկվել է բանավոր վիրավորանքների և սպառնալիքների, այդ թվում՝ երկու երեխաների խնամակալությունը կորցնելու սպառնալիքների։.
Amnesty International իրավապաշտպան կազմակերպությունը պնդում է, որ Համեդանիի գործը կապված է նրա սոցիալական ցանցերում ԼԳԲՏ իրավունքների պաշտպանության հետ: BBC-ն նշում է, որ մահապատժի դատապարտվածը նախկինում նկարահանվել է Իրաքյան Քուրդիստանում ԼԳԲՏ իրավունքների խախտումների մասին վավերագրական ֆիլմում:.
Մարդու իրավունքների պաշտպանները ոչինչ չեն հայտնել մահապատժի դատապարտված երկրորդ կնոջ մասին, չնայած նշում են, որ նույն բանտում նմանատիպ մեղադրանքներ են առաջադրվել մեկ այլ կնոջ՝ 52-ամյա Սոհեյլա Աշրաֆիի դեմ։.
BBC-ն հաղորդում է, որ Իրանում մահապատժի դատավճիռների թիվը զգալիորեն աճել է. միայն հուլիսի վերջին շաբաթվա ընթացքում դատարանը կայացրել է 32 նման դատավճիռ։.
