Էստոնիան նախատեսում է մինչև այս տարվա հունվարի վերջ ստեղծել օրենսդրական շրջանակ, որը թույլ կտա Տալլինի կողմից սառեցված ռուսական ակտիվները փոխանցել Ուկրաինա։ Այս մասին հայտարարել է Էստոնիայի արտաքին գործերի նախարարության խոսնակ Միխկել Թամմը, ինչպես երկուշաբթի՝ հունվարի 9-ին, հաղորդել է Bloomberg-ը։.
Այսպիսով, Էստոնիան կարող է դառնալ Եվրամիության առաջին երկիրը, որը ռուսական ակտիվները կփոխանցի Կիևին, համենայն դեպս, Bloomberg-ը ընդգծում է, որ ոչ մի այլ երկիր չի հայտարարել նման մեխանիզմի ստեղծման մասին։.
Ավելի վաղ նույն գործակալությունը, հղում անելով Գերմանիայի կառավարության աղբյուրներին, հայտնել էր, որ Գերմանիան, որտեղ սառեցվել է մոտ 5 միլիարդ եվրո, նույնպես քննարկում է ռուսական ակտիվների Ուկրաինա փոխանցման հնարավորությունը։ Սակայն Բեռլինը սպասում է Եվրոպական Միության կողմից համախմբված դիրքորոշման և պատրաստ չէ ձեռնարկել ռիսկային, միակողմանի քայլեր, որոնք կարող են հանգեցնել դատական գործընթացների ալիքի։.
Էստոնիայի կողմից սառեցված ռուսական միջոցների ընդհանուր գումարը կազմում է 20 միլիոն դոլար (19 միլիոն եվրո): Ընդհանուր առմամբ, Եվրամիությունը սառեցրել է 68 միլիարդ եվրոյի ռուսական ակտիվներ, որոնց 90 տոկոսը գտնվում է Բելգիայի, Լյուքսեմբուրգի, Իտալիայի, Գերմանիայի, Իռլանդիայի, Ավստրիայի և Ֆրանսիայի մոտ:.
