ԵՄ-ում Չինաստանի դեսպան Ֆու Կոնգը հայտարարել է, որ Պեկինը չի ճանաչում Ռուսաստանի կողմից Ուկրաինայի տարածքի անեքսիան և ռազմական օգնություն չի ցուցաբերում Մոսկվային։ Այս մասին նա հայտարարել է The New York Times-ին տված հարցազրույցում։.
Զրույցը տեղի է ունեցել դեսպանի՝ Ֆրանսիայի նախագահ Էմանուել Մակրոնի և Եվրահանձնաժողովի նախագահ Ուրսուլա ֆոն դեր Լյայենի հետ հանդիպման նախօրեին, ով այսօր կժամանի Չինաստան՝ եռօրյա այցով։.
Դրանում Ֆու Կոնգը հայտարարել է, որ Պեկինը չի ճանաչում Ղրիմը, ո՛չ սեպտեմբերին անեքսիայի ենթարկված «ԴԺՀ»-ն և «ԼԺՀ»-ն, ո՛չ էլ Զապորոժիեի և Խերսոնի մարզերը որպես ռուսական տարածքներ և ռազմական աջակցություն չի ցուցաբերում Մոսկվային։ Սակայն Չինաստանը չի դատապարտել ռուսական ներխուժումը, քանի որ այս որոշման «իրական պատճառներն» ավելի բարդ են, քան Արևմուտքում հաղորդվածները։.
Ավելին, դեսպանն ասել է, որ Ռուսաստանի և Չինաստանի միջև «անսահման բարեկամությունը», որի մասին նշվել էր երկրների հայտարարության մեջ Ուկրաինա Ռուսաստանի կողմից լայնածավալ ներխուժման նախօրեին, «ոչ այլ ինչ է, քան հռետորաբանություն»։.
Կրեմլը մեկնաբանել է դեսպանի հարցազրույցը՝ նշելով, որ Մոսկվան հետևում է Վլադիմիր Պուտինի և Սի Ցզինպինի միջև վերջերս կայացած բանակցությունների ընթացքում ձեռք բերված պայմանավորվածություններին։.
«Մենք կենտրոնանում ենք նախագահ Պուտինի և նախագահ Սի Ցզինպինի միջև վերջերս Մոսկվայում տեղի ունեցած շփումների բովանդակության և ոգու վրա։ Նրանց փոխըմբռնման ամբողջ համատեքստը ներկայացված է երկու փաստաթղթերում, երկու ստորագրված հայտարարություններում, որոնք ընդունվել են ռուս-չինական բանակցությունների արդյունքում։ Դրանք շատ բովանդակալից են և ամբողջությամբ ներառում են համատեղ օրակարգի հարցերի ողջ շրջանակը», - ասել է Ռուսաստանի նախագահի մամուլի քարտուղար Դմիտրի Պեսկովը։.
Մարտի 20-ից 22-ը Մոսկվայում տեղի ունեցան պաշտոնական բանակցություններ Ռուսաստանի նախագահ Վլադիմիր Պուտինի և Չինաստանի նախագահ Սի Ցզինպինի միջև։ Հանդիպումից հետո ստորագրվեց 14 փաստաթղթերից բաղկացած փաթեթ, այդ թվում՝ մինչև 2030 թվականը տնտեսական համագործակցության ծրագրերի վերաբերյալ հայտարարություն և գործընկերության խորացման ծրագրերի վերաբերյալ հայտարարություն։.
