Իտալիայի վարչապետ Մարիո Դրագին հայտարարել է, որ այսօր երեկոյան կներկայացնի իր հրաժարականի դիմումը Հանրապետության նախագահին, հաղորդում է Rai News-ը։.
«Խորհրդարանում իմ երդմնակալության ելույթում ես ասացի, որ այս գործադիր իշխանությունը առաջ կշարժվի միայն այն դեպքում, եթե լինի կառավարության ծրագիրը իրականացնելու հստակ հեռանկար, որի օգտին քվեարկել են քաղաքական ուժերը», - ասաց Դրագին։.
Դրագիի կառավարության ապագան հարցականի տակ դրվեց, երբ կոալիցիոն գործընկեր «Հինգ աստղ» շարժումը հրաժարվեց վստահության քվեարկությունից։.
«Հինգ աստղ» շարժման առաջնորդ Ջուզեպպե Կոնտեն մեղադրեց վարչապետին էներգակիրների գների բարձրացման հետևանքով առաջացած սոցիալական ճգնաժամը լուծելու համար բավարար ջանքեր չգործադրելու մեջ: «Հինգ աստղ» շարժումը հրաժարվեց քվեարկել իտալացիներին տրամադրվող կառավարության օգնության օրինագծի օգտին՝ որոշակի կետերի հետ անհամաձայնության պատճառով:.
Չնայած «Հինգ աստղ» շարժման բոյկոտին, օգնության փաթեթը հաստատվել է Իտալիայի Սենատի կողմից: Այնուամենայնիվ, Դրագին բազմիցս հայտարարել է, որ կգլխավորի միայն ազգային միասնության կառավարություն և չի շարունակի աշխատել առանց «Հինգ աստղ» կուսակցության, որը խորհրդարանում ամենամեծ կուսակցությունն էր մինչև անցյալ ամսվա պառակտումը:.
