Իտալական Մոնցա քաղաքից մի բուժքույր ինքնասպան է եղել կորոնավիրուսի դրական թեստ հանձնելուց հետո, հաղորդում է Daily Mail-ը։.
Երեսունչորսամյա բուժքույր Դանիելա Տրեցին աշխատում էր վերակենդանացման բաժանմունքում, բայց մարտի 10-ից կարանտինում էր՝ կորոնավիրուսային վարակի ախտանիշներ ի հայտ գալուց հետո։ Դրական թեստ հանձնելուց հետո նա ինքնասպան է եղել։ Նա վախենում էր, որ վարակել է ուրիշներին։.
Իտալացի բուժքույրերի ազգային ֆեդերացիան հաստատել է նրա մահը և անհանգստություն հայտնել միջադեպի կապակցությամբ։ Նրանք ընդգծել են, որ Տրեցին ծանր սթրես է տարել՝ վախենալով, որ նա է տարածել վիրուսը։.
Ավելի վաղ հաղորդվել էր, որ Իտալիայի Կրեմոնա քաղաքի կորոնավիրուսով հիվանդներին բուժող հիվանդանոցի բժշկուհին հայտնել է, որ մղձավանջներ է տեսել։ Նա պնդում է, որ հիվանդանոցում դեռևս ոչ ոք չի ապաքինվել, ինչը չափազանց վախեցնող է և հուսահատեցնող բժշկական անձնակազմի համար։.
Վերջին տվյալների համաձայն՝ ամբողջ աշխարհում կորոնավիրուսով վարակվել է ավելի քան 428,000 մարդ, որոնցից 18,900-ը մահացել են, իսկ 109,100-ը՝ ապաքինվել։ Նոր կորոնավիրուսի պատճառով առաջացած COVID-19 թոքաբորբի բռնկումն առաջին անգամ գրանցվել է 2019 թվականի նոյեմբերին Չինաստանի Ուհան քաղաքում։.
