Հունգարիայի վարչապետ Վիկտոր Օրբանը մայիսի 23-ին հայտարարեց արտակարգ դրություն հայտարարելուց հետո առաջին հրամանագրի մասին. խոշոր ընկերությունները պարտավոր կլինեն իրենց ավելցուկային շահույթը ուղղորդել պետական բյուջե։ Այս մասին հաղորդում է Bloomberg-ը՝ հղում անելով Հունգարիայի վարչապետի տեսաուղերձին։.
Հրամանագրի համաձայն՝ բանկային, էներգետիկայի, հեռահաղորդակցության և ավիացիայի ոլորտների ընկերությունները, ինչպես նաև խոշոր մանրածախ առևտրի ցանցերը պետք է իրենց շահույթի մի մասը երկու տարվա ընթացքում փոխանցեն երկու հատուկ ստեղծված հիմնադրամների։.
Այս միջոցներից ստացված գումարը կօգտագործվի քաղաքացիների կոմունալ վճարումները սուբսիդավորելու, ինչպես նաև հունգարական բանակի արդիականացումը ֆինանսավորելու համար։.
«Մենք խնդրում և ակնկալում ենք, որ նրանք, ովքեր այս պատերազմի ընթացքում լրացուցիչ եկամուտ են ստացել, կօգնեն ժողովրդին և իրենց ներդրումը կունենան ազգային պաշտպանության բյուջեում», - տեսաուղերձում ասել է Օրբանը։.
Օրբանը կարծում է, որ շահույթի «բռնագրավումը» կօգնի հավասարակշռել պետական բյուջեն, որը զրկվել է Եվրամիության միջոցներից լրացուցիչ հատկացումներից: Գործակալությունը պարզաբանում է, որ պետական բյուջեի ծախսերի զգալի մասն օգտագործվել է Օրբանի կուսակցության կողմից ապրիլի 3-ի ընտրություններում հաղթանակ տանելու համար:.
Օրբանի համոզիչ հաղթանակից մի քանի օր անց Եվրահանձնաժողովը գործարկեց նորաստեղծ մեխանիզմ, որը թույլ է տալիս կրճատել կոռուպցիայի և օրենքի գերակայության խնդիրներ ունեցող անդամ պետությունների ֆինանսավորումը։.
