Չինաստանի առաջին քաղաքացիական տիեզերագնացների առաքելությունը հասել է «Երկնային պալատ»՝ Տյանգուն տիեզերական կայան։.
Երեք չինացի թայկոնավտներից բաղկացած «Շենժոու-16» առաքելությունը հաջողությամբ կցվեց «Տյանգուն» կայանին (չինարենից թարգմանաբար նշանակում է «Երկնային պալատ»): Սա հինգերորդ անձնակազմն է, որը կցվել է չինական տիեզերական կայանին և առաջինը, որի մեջ ներառված է քաղաքացիական մասնագետ: Նախորդ առաքելությունների բոլոր թայկոնավտները չինական զինված ուժերի անդամներ են:.
«Շենժոու-16»-ի անձնակազմը գլխավորում է հրամանատար Ցզին Հայպենգը, ով իր չորրորդ տիեզերական թռիչքն է իրականացնում: Առաքելության մեջ են նաև ինժեներ Չժու Յանժուն և Բեյհանգի համալսարանի պրոֆեսոր Գուի Հայչաոն, ով ուսումնասիրում է տիեզերանավի դինամիկան և օգտակար բեռների (արբանյակներ և այլ բեռներ) ուղեծիր հասցնելը:.
Չինաստանի օդաչուական տիեզերական գործակալության (CMSA) ներկայացուցիչները հայտարարել են, որ առաքելությունը, որը տիեզերակայանում կմնա մինչև հոկտեմբեր, կիրականացնի գիտական փորձեր։ Դրանք ներառում են կյանքի ծագման, ընդհանուր հարաբերականության տեսության և «բարձր ճշգրտությամբ տարածաժամանակային համակարգերի» հետազոտություններ։.
Տյանգունը Երկրի ուղեծրում ներկայումս գործող միակ ազգային ուղեծրային կայանն է: Չինաստանի կառավարությունը չի մասնակցում Միջազգային տիեզերակայանի շահագործմանը, այլ մշակում է իր սեփական նախագիծը: «Երկնային պալատի» շինարարությունն ավարտվել է անցյալ տարի, և այդ ժամանակվանից այնտեղ տեղակայված է մշտական անձնակազմ:.