Մայիսի 30-ի առավոտյան Ռիգայի փոխքաղաքապետ Լինդա Օզոլան տեսանյութ հրապարակեց, որում երևում է, որ Կրոնվալդա այգում գտնվող Պուշկինի հուշարձանն այլևս չկա։ Ռիգայի քաղաքապետարանի արտաքին կապերի վարչության տվյալներով՝ Կրոնվալդա այգում գտնվող Պուշկինի հուշարձանը տեղափոխվում է և նախատեսվում է այն փոխանցել Լատվիայի նկարիչների միությանը։.
Մայիսի 30-ին Ռիգայի հուշարձանների գործակալությունը Կրոնվալդա այգում գտնվող բանաստեղծ Ալեքսանդր Պուշկինի հուշարձանը տեղափոխեց պահեստ՝ հետագայում այն Լատվիայի նկարիչների միության թանգարանի սեփականությանը փոխանցելու մտադրությամբ, որի հետ ձեռք է բերվել հայեցակարգային համաձայնություն քանդակի պահեստավորման և ապագա ցուցադրության վերաբերյալ։.
Այս որոշումը կայացվել է, քանի որ 2009 թվականին թե՛ Ռիգայի պատմական կենտրոնի պահպանման և զարգացման խորհուրդը, թե՛ Մշակութային հուշարձանների պաշտպանության պետական տեսչությունը չեն հաստատել հուշարձանի տեղադրումը Կրոնվալդա այգում՝ առաջարկելով ընտրել այլընտրանքային վայրեր։.
Արդյունքում, հուշարձանը տեղադրվել է իր ներկայիս տեղում և մնացել է կանոնակարգերին չհամապատասխանող։ 2023 թվականի մարտի 3-ին Ռիգայի քաղաքային խորհրդի հուշարձանների խորհուրդը իր աջակցությունը հայտնեց հուշարձանն ավելի հարմար վայր տեղափոխելուն։.
Հուշարձանը կփոխանցվի Լատվիայի նկարիչների միության կառավարմանը պաշտոնական համաձայնագրի կնքումից հետո։.
Հիշենք, որ Պուշկինի հուշարձանի տեղափոխման հարցը երկար ժամանակ քննարկվել է Ռիգայի քաղաքային խորհրդում և համապատասխան հանձնաժողովներում։.
Մարտի 3-ին Ռիգայի քաղաքային խորհրդի հուշարձանների խորհուրդը կողմ արտահայտվեց վեց հուշարձանների հեռացմանը կամ տեղափոխմանը՝ նշելով, որ դրանք փառաբանում են խորհրդային դարաշրջանը։ Այդ հուշարձանների թվում էր նաև Կրոնվալդա այգում գտնվող Պուշկինի հուշարձանը։.
Ռիգայի քաղաքապետ Մարտինս Ստակիսը արձագանքեց դրան՝ նշելով, որ «Ռիգայի քաղաքապետարանն այժմ ավելի կարևոր խնդիրներ ունի, քան հուշարձանների դեմ պայքարը»։.
Մարտի 12-ին մոտ 200 մարդ հավաքվել էր Լատվիայի Ռուսական Միության կողմից կազմակերպված պիկետի՝ ռուս գրող Ալեքսանդր Պուշկինի հուշարձանի քանդման դեմ։.
Այդ ժամանակվանից ի վեր Պուշկինի հուշարձանը բազմիցս ենթարկվել է վանդալների հարձակումների. նրա գլխին աղբի տոպրակ է դրվել, իսկ այն ներկվել է Լատվիայի դրոշի գույներով։.
Նշենք, որ նման բողոքի ցույցեր տեղի են ունեցել նաև նախկինում՝ 2022 թվականի փետրվարի 24-ից հետո, սակայն դրանք ավելի հաճախակի դարձան հուշարձանի ապամոնտաժման հարցի բարձրացման հետ մեկտեղ։.