Գերմանիայի նախագահ Ֆրանկ-Վալտեր Շտայնմայերը խոստովանել է Ռուսաստանի նկատմամբ իր քաղաքականության մեջ թույլ տրված սխալները, ինչպես նաև «Ռուսաստանի մասնակցությամբ եվրոպական ընդհանուր տուն ստեղծելու» և այն եվրոպական անվտանգության ընդհանուր ճարտարապետությանը ինտեգրելու ձախողումը, հաղորդում է DW-ն։.
«Իմ հանձնառությունը «Հյուսիսային հոսք 2» գազատարին ակնհայտ սխալ էր։ Մենք կառչեցինք կամուրջներից, որոնց Ռուսաստանը այլևս չէր հավատում, ինչպես մեր գործընկերներն էին մեզ զգուշացրել», - ասաց Շտայնմայերը։.
Գերմանիայի նախագահի խոսքով՝ ինքը չէր կարող պատկերացնել, որ ռուս բռնապետ Վլադիմիր Պուտինը, իրեն համակած կայսերական խելագարության պատճառով, կդիմի իր երկրի լիակատար տնտեսական, քաղաքական և բարոյական քայքայմանը։.
Գերմանիայի պետության ղեկավարը Ռուսաստանի նախագահին պատասխանատու է համարել Ուկրաինայի դեմ պատերազմի համար և վստահեցրել, որ Պուտինի օրոք Ռուսաստանը «չի վերադառնա պատերազմից առաջ եղած ստատուս քվոյին»։.
Այսօր Լեհաստանի վարչապետ Մատեուշ Մորավեցկին հայտարարել է, որ Գերմանիան Ռուսաստանի դեմ ավելի խիստ պատժամիջոցների ներդրման գլխավոր խոչընդոտն է։.
Դրանից հետո Գերմանիայի արտաքին գործերի նախարար Աննալենա Բերբոկը հայտարարեց, որ Գերմանիան կարտաքսի Ռուսաստանի դեսպանատան աշխատակիցների զգալի մասին՝ ի պատասխան Բուչայում ռուս օկուպանտների կողմից կատարված վայրագությունների: «Մենք կխստացնենք Ռուսաստանի դեմ գործող պատժամիջոցները, վճռականորեն կընդլայնենք մեր աջակցությունը Ուկրաինայի զինված ուժերին և կամրապնդենք ՆԱՏՕ-ի արևելյան թևը», - հայտարարեց Բերբոկը:.
