Reuters-ի փոխանցմամբ՝ Սիրիայի ժամանակավոր նախագահ Ահմեդ ալ-Շարաան առաջին անգամ ժամանել է Մոսկվա՝ նախորդ ռեժիմի տապալումից հետո։.
Նրան Կրեմլում ընդունեց Վլադիմիր Պուտինը։ Ռուսաստանի առաջնորդը նշեց երկրների միջև «հատուկ հարաբերությունները» և ընդգծեց, որ Մոսկվան «երբեք դրանք չի կառուցել քաղաքական նպատակահարմարության վրա»։.
Պուտինը հայտարարել է, որ Սիրիան «դժվար ժամանակներ» է ապրում, սակայն վստահություն է հայտնել, որ վերջերս կայացած խորհրդարանական ընտրությունները կօգնեն «ամրապնդել բոլոր քաղաքական ուժերի միջև համագործակցությունը»։ Ի պատասխան՝ ալ-Շարաան հայտարարել է, որ Ռուսաստանը «նշանակալի դեր կխաղա նոր Սիրիայի զարգացման գործում», հաղորդում է ՏԱՍՍ-ը։.
Սակայն, ըստ Reuters-ի, Սիրիայի առաջնորդի այցն ունի շատ ավելի լարված ֆոն։ Գործակալության աղբյուրները պնդում են, որ ալ-Շարաան մտադիր է պաշտոնապես պահանջել Մոսկվայից արտահանձնել նախկին նախագահ Բաշար ալ-Ասադին, որը ներկայումս թաքնվում է Ռուսաստանում։ Փախստական քաղաքական գործիչը մեղադրվում է «սիրիացիների դեմ հանցագործությունների» մեջ։.
Աղբյուրը նաև հայտնել է, որ ժամանակավոր նախագահը մտադիր է քննարկել Տարտուսում և Խմեյմիմում ռուսական ռազմաբազաների պահպանման հարցը: Ռուսաստանի արտաքին գործերի նախարարության խոսնակ Մարիա Զախարովայի խոսքով՝ քննարկվում է նաև երկրում ռուսական ռազմական օբյեկտների ֆունկցիոնալության հնարավոր «վերաձևակերպումը»:.
Ասադի ռեժիմը տապալվեց դեկտեմբերի 8-ին, երբ զինված ընդդիմության ուժերը մտան Դամասկոս: Ալ-Շարաան, որը նախկինում խմբակցություններից մեկի անդամ էր, դարձավ անցումային նախագահ: Ինքը՝ Ասադը, ըստ գերմանական Die Zeit , ապրում է Մոսկվա քաղաքում, որտեղ նա իր ժամանակն անցկացնում է առցանց խաղեր խաղալով:
Պուտինի և ալ-Շարաայի բանակցությունները տեղի են ունենում փակ դռների հետևում, և հանդիպման արդյունքը կարող է վճռորոշ լինել ռուս-սիրիական հարաբերությունների ապագայի և հենց Ասադի ճակատագրի համար։.
