Ուկրաինայի նախագահ Վլադիմիր Զելենսկին անսպասելի այցով ժամանել է Ֆինլանդիա։ Այս մասին հայտնել է նրա մամուլի քարտուղար Սերգեյ Նիկիֆորովը։.
Նրա խոսքով՝ Զելենսկին բանակցություններ կվարի Ֆինլանդիայի նախագահ Սաուլի Նիինիստյոյի և Ֆինլանդիայի խորհրդարանի խոսնակ Պետերի Օրպոյի հետ, ինչպես նաև կմասնակցի Ուկրաինա-Հյուսիսային Եվրոպա գագաթնաժողովին։.
«Ուկրաինայի և հինգ սկանդինավյան երկրների ղեկավարների հանդիպումը կազմակերպվել է մեր երկրին ռազմական օգնություն ցուցաբերելու և Ուկրաինայի եվրոպական ու եվրաատլանտյան ինտեգրման հետագա համակարգման նպատակով։ Հանդիպումից հետո սպասվում է համատեղ հայտարարություն», - գրել է Նիկիֆորովը Ֆեյսբուքում։.
Բացի այդ, Ուկրաինայի նախագահը առանձին երկկողմ հանդիպումներ կունենա Դանիայի, Իսլանդիայի, Նորվեգիայի և Շվեդիայի վարչապետների հետ։.
Ֆինլանդիայի նախագահի գրասենյակը նույնպես հայտարարել է Զելենսկու այցի մասին։ Մամուլի հաղորդագրության մեջ նշվում է, որ պետությունների ղեկավարները կքննարկեն Ֆինլանդիայի աջակցությունը Ուկրաինայի պաշտպանությանը ռուսական ագրեսիայից, երկրների միջև երկկողմ հարաբերությունները և համաշխարհային աշխարհաքաղաքական իրավիճակը։.
Նախագահների աշխատանքային ճաշին կմասնակցեն նաեւ վարչապետ Սաննա Մարինն ու արտգործնախարար Պեկկա Հաավիստոն։.
