Եվրամիությունը Ռուսաստանի դեմ պատժամիջոցների 13-րդ փաթեթն է ընդունել, հայտնում է Եվրոպայի խորհրդի կայքը։.
Պատժամիջոցները համընկնում են Ռուսաստանի կողմից Ուկրաինա լայնածավալ ներխուժման երկրորդ տարելիցի հետ։ Սահմանափակումները վերաբերում են 106 անհատների և 88 կազմակերպությունների, որոնք, ըստ Եվրամիության, «պատասխանատու են այն գործողությունների համար, որոնք խաթարում կամ սպառնում են Ուկրաինայի տարածքային ամբողջականությանը, ինքնիշխանությանը և անկախությանը»։.
Ռուսական ընկերություններից բացի, պատժամիջոցներ են կիրառվել նաև այլ երկրների՝ Հնդկաստանի, Չինաստանի, Շրի Լանկայի, Սերբիայի, Ղազախստանի, Թաիլանդի և Թուրքիայի ձեռնարկությունների նկատմամբ: Եվրամիության տվյալներով՝ այս երկրները աջակցում են ռուսական պաշտպանական արդյունաբերությանը՝ օգնելով նրան շրջանցել գործող սահմանափակումները:.
«Այսօր մենք ավելի ենք խստացնում Ռուսաստանի ռազմական և պաշտպանական ոլորտի նկատմամբ սահմանափակող միջոցառումները՝ թիրախավորելով երրորդ երկրներում գտնվող նոր ընկերություններին, որոնք մատակարարում են սարքավորումներ, ինչպես նաև ուկրաինացի երեխաների անօրինական արտաքսման համար պատասխանատուներին։ Մենք շարունակում ենք միասնական մնալ Ռուսաստանի ռազմական մեքենան քանդելու և Ուկրաինային օգնելու հաղթանակ տանել ինքնապաշտպանության համար իր օրինական պայքարում և վերականգնել իր անկախությունը, տարածքային ամբողջականությունը և ինքնիշխանությունը», - ասել է ԵՄ արտաքին գործերի նախարար Ժոզեպ Բորելը։.
Բացի այդ, ԵՄ իշխանությունները ընդլայնել են արտահանման համար արգելված այն ապրանքների ցանկը, որոնք «կարող են նպաստել Ռուսաստանի պաշտպանական ոլորտի տեխնոլոգիական առաջընթացին»։ ԵՄ պաշտոնական հանդեսը դեռևս չի հրապարակել պատժամիջոցների ենթարկված ապրանքների ցանկը։.
