Եվրամիությունը կրկին հրաժարվել է բացել Ռուսաստանի հետ սահմանները։ Այս մասին հայտնել է ՌԻԱ Նովոստին հինգշաբթի՝ հոկտեմբերի 15-ին։.
Գործակալության աղբյուրի փոխանցմամբ՝ Եվրամիության խորհուրդը անփոփոխ է թողել այն երկրների ցանկը, որոնց հետ կարող են բացվել արտաքին սահմանները, որը թարմացվում է յուրաքանչյուր երկու շաբաթը մեկ։.
Այսպիսով, ցանկում դեռևս ներառված են 11 երկիր՝ Ավստրալիա, Նոր Զելանդիա, Կանադա, Ճապոնիա, Հարավային Կորեա, Վրաստան, Ռուանդա, Թունիս, Թաիլանդ, Ուրուգվայ և Չինաստան (սահմանների բացման հարցում փոխադարձության հաստատման պայմանով):.
Այս երկրների ընտրության չափանիշներն էին համաճարակաբանական իրավիճակը և համաճարակը զսպելու միջոցառումները դրանցից յուրաքանչյուրում, ինչպես նաև «տնտեսական և սոցիալական նկատառումները»։.
Ավելի վաղ հաղորդվել էր, որ Ռուսաստանը նոյեմբերի 1-ից կվերսկսի ուղևորատար ավիահաղորդակցությունը դեպի Սերբիա, Կուբա և Ճապոնիա: Ներկայումս ռուս զբոսաշրջիկների համար բաց են Թուրքիան, Արաբական Միացյալ Էմիրությունները, Մալդիվները, Եգիպտոսը, Տանզանիան, Բելառուսը, Միացյալ Թագավորությունը, Շվեյցարիան, Հարավային Կորեան, Ղազախստանը և Ղրղզստանը:.
