Ռուսաստանի իշխանությունները գրանցում են հայտարարված զորահավաքից հետո երկիրը լքող քաղաքացիների անունները, հայտարարել է Պետդումայի խոսնակ Վյաչեսլավ Վոլոդինը։ Նա չի նշել ցուցակները կազմելու նպատակը, սակայն հավելել է, որ հարցը մնում է անպատասխան, թե ինչպես վարվել նման քաղաքացիների հետ, եթե նրանք վերադառնան։.
«Մենք ցուցակներ ենք կազմում բոլոր նրանց, ովքեր այս պահին լքում են երկիրը։ Կարծում եք՝ նրանք լքում են, և ոչ ոք չի կարող տեսնել, թե ով է հեռացել և ինչու՞», - սեպտեմբերի 28-ին Դումայի նիստում ասաց Վոլոդինը։.
Նրա խոսքով՝ ռուսները մոբիլիզացիայից փախչում են Եվրասիական տնտեսական համագործակցության երկրներ, որտեղ Մոսկվան, ինչպես ինքն է ասել, «կայունություն է ստեղծել», Վոլոդինի խոսքերը մեջբերել է «Ռոսիյսկայա գազետա» պաշտոնական կառավարական թերթը։.
«Նրանց, ովքեր այսօր հապաղում են և կիլոմետրերով հերթեր են կանգնում Վրաստան, Ղազախստան և այլ հանրապետություններ մեկնելու համար, պետք է այլ կերպ վերաբերվել, քան նրանց, ովքեր համազգեստ են հագել և գնացել են երկիրը պաշտպանելու», - հայտարարեց Պետդումայի խոսնակը։.
Պետդումայի պաշտպանության կոմիտեի անդամ Անդրեյ Գուրուլևը չի կարծում, որ Վոլոդինի հայտարարությունը ճշգրիտ է։ Նա պնդում է, որ արտասահման մեկնող ռուսների ցուցակներ չեն կազմվում, այլ դրանք մուտքագրվում են սահմանը հատողների միասնական տվյալների բազայում, հաղորդում է «ՌԻԱ Նովոստի»-ն։.
«Նախևառաջ, անհրաժեշտ չէ որևէ ցուցակ կազմել: Կա Ռուսաստանի սահմանը հատող մարդկանց միասնական տվյալների բազա: Սահմանը հատողները արտացոլվում են այս միասնական տվյալների բազայում», - ասաց իշխող «Եդինայա Ռոսիա» կուսակցության պատգամավորը:.
