Պուտինը նաև հայտնել է, որ Սանկտ Պետերբուրգի Վագների գրասենյակում հայտնաբերվել է 10 միլիարդ ռուբլի կանխիկ և 5 կգ կոկաին։.
Ռուսաստանի նախագահ Վլադիմիր Պուտինը հայտարարել է, որ «Վագներ» ՊՄԿ-ի հիմնադիր Եվգենի Պրիգոժինի մարմնում, ինչպես նաև Տվերի մարզում ինքնաթիռի վթարի հետևանքով նրա հետ զոհված այլ անձանց մարմիններում հայտնաբերվել են ձեռքի նռնակների բեկորներ։ Այս մասին նա հայտարարել է «Վալդայ» քննարկման ակումբի նիստում։.
«Մենք գիտենք ինքնաթիռի վթարի մասին։ Քննչական կոմիտեի ղեկավարը վերջերս ինձ զեկուցեց, որ զոհերի մարմիններում հայտնաբերվել են ձեռքի նռնակների բեկորներ։ Ինքնաթիռի վրա արտաքին ազդեցություն չի եղել», - հայտարարեց Ռուսաստանի նախագահ Վլադիմիր Պուտինը։ Նա նաև ասաց, որ ալկոհոլի կամ թմրանյութերի թեստեր չեն անցկացվել և հավելեց, որ Սանկտ Պետերբուրգի գրասենյակում ԱԴԾ-ն հայտնաբերել է 10 միլիարդ ռուբլի կանխիկ և հինգ կիլոգրամ կոկաին։.
ԱՄՆ հետախուզության նախնական գնահատականների համաձայն՝ «Վագներ» ՊՄԿ-ի ղեկավարի մահվան պատճառ դարձած ինքնաթիռի վթարը դիտավորյալ պայթյունի հետևանք է եղել։.
Շերեմետևոյից Սանկտ Պետերբուրգ թռչող Embraer Legacy 600 ինքնաթիռը վթարի է ենթարկվել Տվերի մարզում «Վագներ» խմբի ապստամբությունից երկու ամիս անց։ Զոհվել է տասը մարդ։.
Ավելի վաղ Կրեմլը հերքել էր Տվերի մարզում վթարի ենթարկված Եվգենի Պրիգոժինի և «Վագներ» խմբի մյուս անդամների մահվան մեջ որևէ ներգրավվածություն։ Վլադիմիր Պուտինի մամուլի քարտուղար Դմիտրի Պեսկովը նման հաղորդագրությունները անվանել էր «բացարձակ ստեր» և «ենթադրություններ»։.
