ՆԱՏՕ-ն կվերանայի իր դիրքորոշումը Ուկրաինայի պատերազմին չմիջամտելու վերաբերյալ, եթե Ռուսաստանը քիմիական զենք կիրառի։.
Լեհաստանի առաջնորդը կարծում է, որ Ռուսաստանի ղեկավարությունը ունակ է այս քայլին դիմելու։ Այս մասին հայտարարել է Լեհաստանի նախագահ Անջեյ Դուդան, ինչպես մեջբերում է BBC-ն։.
«Եթե ինձ հարցնում եք, թե արդյոք Պուտինը կարող է քիմիական զենք օգտագործել, ապա կարծում եմ, որ այս պահին Պուտինը կարող է օգտագործել ամեն ինչ, հատկապես, երբ դժվարին իրավիճակում է։ Նա արդեն պարտվել է այս պատերազմում քաղաքականապես, և ակնհայտ է, որ ռազմական առումով էլ չի հաղթում», - ասաց Դուդան։.
Զանգվածային ոչնչացման զենքի կիրառումը կփոխի խաղի բոլոր կանոնները, նշեց Լեհաստանի նախագահը։ Սպառնալիքը կհասնի ոչ միայն Եվրոպային, այլև ամբողջ աշխարհին, և ՆԱՏՕ-ն ստիպված կլինի գործողություններ ձեռնարկել։.
ՆԱՏՕ-ի գլխավոր քարտուղար Յենս Ստոլտենբերգը նախկինում զգուշացրել էր Ռուսաստանի կողմից քիմիական հարձակման հնարավորության մասին։ Նա հայտարարել էր, որ Ռուսաստանի պնդումները, թե Ուկրաինայում գործում են քիմիական և կենսաբանական զենքի լաբորատորիաներ, կարող են նախապատրաստություն լինել Ռուսաստանի կողմից նման քայլի համար։.
