Ուկրաինայի ռազմական հրամանատարությունը լուրջ է վերաբերվում ռուսական զորահավաքի տվյալներին և 2023 թվականի առաջին եռամսյակում սպասում է Կիևի վրա նոր հարձակման և հարավից ճեղքման փորձի։ Այս մասին The Economist-ին տված հարցազրույցում հայտարարել է Ուկրաինայի զինված ուժերի գլխավոր հրամանատար Վալերի Զալուժնին։.
«Ռուսական զորահավաքը աշխատեց։ Ճիշտ չէ, որ նրանց խնդիրներն այնքան լուրջ են, որ այս մարդիկ չեն կռվի։ Նրանք կկռվեն։ Ցարը նրանց ասում է գնալ կռվելու, և նրանք գնում են կռվելու։».
«Ես ուսումնասիրել եմ երկու չեչենական պատերազմների պատմությունը. այն նույնն էր։ Նրանք գուցե այդքան լավ զինված չեն, բայց միևնույն է, խնդիր են մեզ համար։ Մենք գնահատում ենք, որ նրանք ունեն 1.2-1.5 միլիոն մարդուց բաղկացած պահեստազորային ուժեր...», - նշել է Զալուժնին։.
Նրա խոսքով՝ Ռուսաստանը կուտակում է մարդիկ և զենք նոր հարձակման համար, մինչդեռ Ուկրաինան այժմ պետք է կենտրոնանա հաջորդ տարի սկսվող երկարատև և դժվար մարտերի համար ռեսուրսներ կուտակելու վրա։.
«Մեզ համար կարևոր ռազմավարական խնդիր է ստեղծել պահեստազոր և պատրաստվել պատերազմի, որը կարող է տեղի ունենալ փետրվարին, լավագույն դեպքում՝ մարտին, իսկ վատագույն դեպքում՝ հունվարի վերջին», - ասաց նա։.
Ռուսաստանը կարող է խոշոր հարձակում սկսել Դոնբասից՝ արևելքից, հարավից կամ նույնիսկ Բելառուսից։ Ռուսական զորքերը կփորձեն հետ մղել ուկրաինական ուժերը և նույնիսկ կարող են երկրորդ փորձ կատարել Կիևը գրավելու համար։.
Զալուժնին նաև հայտարարել է, որ Ուկրաինայի զինված ուժերն այժմ ունեն երեք հիմնական խնդիր՝ պահպանել ներկայիս սահմանները, կուտակել պաշարներ պատերազմի հաջորդ փուլի համար և բանակին ապահովել հակաօդային և հրթիռային պաշտպանության համակարգերով՝ մասնավորապես Ուկրաինայի քաղաքացիական ենթակառուցվածքները պաշտպանելու նպատակով։.
«Կարծում եմ՝ մենք քայլում ենք նուրբ գծով։ Եթե [էլեկտրամատակարարման ցանցը] քանդվի... ապա զինվորների կանայք ու երեխաները կսկսեն սառչել։ Եվ ի՞նչ տրամադրություն կունենան զինվորները այդ դեպքում, կարո՞ղ եք պատկերացնել։ Առանց ջրի, էլեկտրաէներգիայի և ջեռուցման, կարո՞ղ ենք խոսել պահեստազոր պատրաստելու մասին՝ մարտական գործողությունները շարունակելու համար», - ասում է գլխավոր հրամանատարը։.
Միաժամանակ, Զալուժնին վստահ է, որ Ուկրաինան կկարողանա վերադարձնել պատերազմի սկսվելուց հետո Ռուսաստանի կողմից օկուպացված տարածքները: Դրան հասնելու համար, ըստ գերագույն գլխավոր հրամանատարի, Ուկրաինային անհրաժեշտ է լրացուցիչ 300 տանկ, 600-700 հետևակի մարտական մեքենա և 500 հաուբից:.
Ուկրաինայի զինված ուժերի գերագույն հրամանատարը նշել է, որ Ուկրաինան սպառում է իր առկա պաշտպանական համակարգերի համար նախատեսված զինամթերքը: Ուկրաինա ժամանելու սպասվող ամերիկյան Patriot հակաօդային պաշտպանության համակարգերը մեծ խթան կլինեն Ուկրաինայի զինված ուժերի համար, սակայն զինվորներին դրանց օգտագործման համար պատրաստելը ժամանակ կպահանջի:.
