Ռուսաստանի Բելգորոդի մարզի ռազմական բազայում, շաբաթ օրը՝ հոկտեմբերի 15-ին, ժամը 10:00-ի սահմաններում, կրակոցներ են տեղի ունեցել: Տարբեր տեղեկությունների համաձայն՝ կրակոցների հետևանքով զոհվել է 10-ից 22 մարդ: Ռուսաստանի պաշտպանության նախարարությունը հաստատել է միջադեպը՝ այն անվանելով ահաբեկչական հարձակում:.
Ռուսաստանի պաշտպանության նախարարությունը հայտարարել է, որ «ԱՊՀ երկրներից մեկի երկու քաղաքացիներ» ահաբեկչական գործողություն են կատարել Արևմտյան ռազմական օկրուգի Բելգորոդի մարզում գտնվող զորավարժարանում։.
«Ահաբեկչական հարձակումը տեղի է ունեցել Ուկրաինայում ռազմական գործողությանը մասնակցելու պատրաստ կամավորների համար նախատեսված հրազենի կիրառման վարժանքների ժամանակ։ Հանցագործները կրակ են բացել զորավարժարանում հավաքվածների վրա և սպանվել պատասխան կրակից», - հայտնել է նախարարությունը։ Գործակալությունը պարզաբանել է, որ «ահաբեկիչները» կրակ են բացել ստորաբաժանման անձնակազմի վրա՝ սպանելով 11 և վիրավորելով 15-ին։ Telegram Mash ալիքի հաղորդմամբ՝ զոհվածները մոբիլիզացվել են Ռուսաստանի Բրյանսկի մարզից։.
Ռուսաստանի պաշտպանության նախարարությունը չի բացատրում, թե ինչպես են օտարերկրյա քաղաքացիները, նույնիսկ ԱՊՀ երկրներից, զենքերով հայտնվել բանակային վարժարանում։.
Որոշ ռուս ռազմական բլոգերներ գրում են, որ վարժանքների հրապարակը գտնվում է Ուկրաինայի սահմանի մոտ, սակայն այս տեղեկատվությունը դեռևս հաստատված չէ։.
Նախկինում Սոտան, հղում անելով աուդիոձայնագրությանը, որը, հավանաբար, «կրակոցների զոհերից մեկի քրոջն» է, հայտնել էր, որ կրակոցները տեղի են ունեցել զորահավաքային զինվորների վարժանքների վայրում: Զինվորականների հարազատներից Սոտայի աղբյուրը հայտնել է, որ վարժանքների վայրը գտնվում է Սոլոտի գյուղում: Որոշ տեղեկությունների համաձայն, կրակոցներ են արձակել երեք զինվորներ: Երկուսը զոհվել են տեղում, իսկ մեկը կարողացել է փախչել: Սոտան հաղորդում է, որ աուդիոձայնագրության համաձայն՝ կրակոցների հետևանքով զոհվել է 22 մարդ, իսկ 16-ը՝ վիրավորվել: Սակայն ձայնագրության իսկությունը դեռևս չի կարող հաստատվել:.
«Օստորոժնո Նովոստի» Telegram ալիքը, հղում անելով զորահավաք անցած զինվորներից մեկի ազգականին, հաղորդել է, որ երկու զինված զինվորներ կրակ են բացել՝ սպանելով 12 մարդու։.
