Երեքշաբթի՝ հունիսի 21-ին, Մեծ Բրիտանիայում սկսվեց վերջին 30 տարվա ընթացքում ամենամեծ երկաթուղային գործադուլը։ Տասնյակ հազարավոր աշխատակիցներ դուրս եկան փողոցներ՝ պահանջելով ավելի բարձր աշխատավարձ և ավելի շատ աշխատատեղեր։.
Ըստ «Ռոյթերս»-ի՝ սա կարող է լինել տնտեսության բոլոր ոլորտներում առաջիկա ամիսներին լայնածավալ գործադուլների սկիզբը: Երկաթուղային ավելի քան 40,000 աշխատողներից մի քանիսը լուսաբացին հավաքվել էին պիկետային գծերի վրա՝ կանգնեցնելով երկաթուղային ցանցը և թողնելով խոշոր կայարանները դատարկ: Լոնդոնի մետրոն նույնպես մեծ մասամբ փակվել էր առանձին գործադուլի պատճառով:.
Վարչապետ Բորիս Ջոնսոնը հայտարարել է, որ գործադուլը կվնասի բիզնեսներին, քանի որ նրանք շարունակում են վերականգնվել համավարակից։.
Մինչդեռ արհմիությունները կարծում են, որ երկաթուղային գործադուլները կարող են նշանավորել «դժգոհության ամառվա» սկիզբը, որի ընթացքում ուսուցիչները, բժիշկները, թափոնների վերամշակման աշխատողները և նույնիսկ փաստաբանները գործադուլ կանեն, քանի որ սննդամթերքի և վառելիքի գների կտրուկ աճը գնաճը հասցնում է մինչև 10%:.
Երկաթուղային և ծովային միության գլխավոր քարտուղար Միք Լինչը հայտարարել է, որ բրիտանացի աշխատողները կարիք ունեն աշխատավարձի բարձրացման։.
«Նրանց անհրաժեշտ է աշխատանքի անվտանգություն, պատշաճ աշխատանքային պայմաններ և ընդհանուր առմամբ արդար պայմանագրեր։ Եթե մենք կարողանանք դրան հասնել, ապա բրիտանական տնտեսության մեջ չեն լինի այն խափանումները, որոնք մենք հիմա ենք զգում և որոնք կարող են զարգանալ ամռանը», - բացատրեց նա։.
Երկաթուղայինների գործադուլը նշանակում է, որ Մեծ Բրիտանիայի երկաթուղային ցանցի միայն մոտ կեսը կգործի գործադուլի օրերին, ընդ որում՝ այս գծերով ծառայությունները շատ սահմանափակ են, իսկ գործադուլների միջև ընկած օրերին խափանումները կշարունակվեն։.
